မိူဝ်ႈဝၼ်းတီႈ 18 လိူၼ်ၸူႇလၢႆႇ 2010 ၵၢင်ၼႂ် 9 မူင်းၼၼ်ႉ မီးပၢင်ယုၵ်ႉယွင်ႈ ၸဝ်ႈတႃႇၼ လူႇတၢၼ်းပပ်ႉလိၵ်ႈ တႃႇႁူင်းလၢႆးတႆး ဢၼ်တေၵေႃႇတင်ႈ ၼႂ်းဝၢင်းဝတ်ႉတႆးဢွင်ႇမျေႇၽုင်ႇသႃႇ ၵဝ်ႈလၵ်း ဝဵင်းတႃႈၵုင်ႈၼၼ်ႉ။
တီႈပၢင်ၵႅဝ်ႈၼႆႉ လႆႈႁၼ် ၶူးသွၼ်လူင် ၸၢႆးဢွင်ႇထုၼ်း၊ တွၵ်ႇတႂ်ႇ ၸၢႆးသၢင်ႇဢၢႆႈ၊ ႁူဝ်ပဝ်ႈ ၵေႃလိၵ်ႈၾိင်ႈတႆး တႃႈၵုင်ႈ ၸၢႆးၵႅဝ်ႈတိပ်ႉၶဝ်၊ ၸဝ်ႈတႃႇၼႃႉပပ်ႉလိၵ်ႈ ၸိူဝ်းပဵၼ် ၼၢင်းထေးထေး ၵေႃႉပဵၼ်မေးၼၢင်း ၸဝ်ႈထုၼ်းမၢတ်ႈဝိၼ်း လႄႈ လုၵ်ႈလၢင်းမၼ်းၸဝ်ႈ၊ ၶူးသွၼ်လူင် ၼၢင်းႁွမ်လဵၵ်း ၶဝ် မႃးၶဝ်ႈႁူမ်ႈသေ ၽူႈၼၢမ်းၼႂ်း ၵေႃလိၵ်ႈၾိင်ႈတႆး တႃႈၵုင်ႈ ၼၢင်းဝူဝ်းသႅင် သမ်ႉ ႁဵတ်းၽူႈၶပ်းပၢင်ၵႂႃႇ။
မိူဝ်ႈၶူးသွၼ်လူင် ၸၢႆးဢွင်ႇထုၼ်း မွၵ်ႇလၢတ်ႈၶေႃႈၵႂၢမ်းၼၼ်ႉ မၼ်းၸဝ်ႈလၢတ်ႈဝႃႈ "လွင်ႈလူႇပပ်ႉလိၵ်ႈၸိူင်ႉၼႆၼႆႉ ပွၵ်ႈၼႆႉ ပဵၼ်ပွၵ်ႈဢွၼ်တၢင်းသုတ်း၊ မိူဝ်ႈပူၼ်ႉမႃးတႄႉ ပႆႇယၢမ်ႈႁၼ်မႃး" ၼႆယဝ်ႉ။
တွၵ်ႇတႂ်ႇ ၸၢႆးသၢင်ႇဢၢႆႈသမ်ႉ ၶႆႊၼေ ၽႅၼ်ၵၢၼ် တႃႇတေမူၼ်ႉမႄး ၵျွင်းၸေႃးတီႉၵဝ်ႇ ၼႂ်းဝတ်ႉၵဝ်ႈလၵ်းသေ တေၵေႃႇတင်ႈ ႁူင်းလၢႆးဢၼ်ၼိူင်ႈၼႆႉယူႇ။
(1) မိူဝ်ႈသြႃႇလူင် ၸၢႆးဢွင်ႇထုၼ်း မွၵ်ႇလၢတ်ႈၶေႃႈၵႂၢမ်း (2) ၼၢင်းထေးထေး မေးၼၢင်း ၸဝ်ႈထုၼ်းမၢတ်ႈဝိၼ်း
ယဝ်ႉၵေႃႈ ႁူဝ်ပဝ်ႈ ၵေႃလိၵ်ႈၾိင်ႈတႆး တႃႈၵုင်ႈ ၸၢႆးၵႅဝ်ႈတိပ်ႉသမ်ႉ ယိုၼ်ႈပၼ်ဝႂ်ယွင်ႈယေႃး လႄႈ ၶူဝ်းတွၼ်ႈ ထိုင် ၼၢင်းထေးထေး လႄႈ ၼၢင်းႁွမ်လဵၵ်း ၶဝ်ယူႇ။
သိုပ်ႇသေလႄႈ ၼၢင်းထေးထေးသမ်ႉ ၶိုၼ်းၶူၼ်ႉၶႆႊၼေ လွင်ႈၸဝ်ႈထုၼ်းမၢတ်ႈဝိၼ်း ၵေႃႉသဵင်ႈၵၢမ်ႇၵႂႃႇၼၼ်ႉ။ ၼၢင်းႁွမ်လဵၵ်း ၵေႃႈသိုပ်ႇၶႆႊၼေ ၵဵဝ်ႇလူၺ်ႈ လၢႆးတႃႇတေၵေႃႇတင်ႈ ႁူင်းလၢႆးဢၼ်ၼိူင်ႈ သေ ႁုပ်ႈသိမ်းပၢင်ၵႅဝ်ႈၵႂႃႇ။
ပပ်ႉလိၵ်ႈ ဢၼ်ၼၢင်းထေးထေး တၢင်တူဝ် ၸဝ်ႈထုၼ်းမၢတ်ႈဝိၼ်းသေ မႃးလူႇတၢၼ်းၵႂႃႇၼၼ်ႉ မီးမွၵ်ႈ 1000 ပၢႆပပ်ႉ။
ၸ
ဝ်ႈထုၼ်းမၢတ်ႈဝိၼ်း ၵေႃႉသဵင်ႈၵၢမ်ႇၵႂႃႇၼၼ်ႉ ပဵၼ်ၸႃႇတီႉမိူင်းသွၵ်ႇသေ ၸူပ်းလႆႈၸုမ်ႈၶူး B.A. လႄႈ M.A. တီႈၸၼ်ႉၸွမ်တႃႈၵုင်ႈသေဢမ်ႇၵႃး ၸူပ်းလႆႈၸုမ်ႈၶူး M.A. တီႈ ၸၼ်ႉၸွမ် Havard မိူင်းႁူမ်ႈတုမ်ႊ ဢမေးရီးၶႂ်းၵွၼ်ႇ။ မၼ်းၸဝ်ႈ ၽူႈႁၢပ်ႇၵၢၼ် လူင်ပွင်ႊၸိုင်ႈ တီႈႁွင်ႈၵၢၼ်ၾၢႆႇသႃႇသၼႃႇၵိူဝ်းယမ် တေႃႇထိုင် ၸၼ်ႉၸွမ်ၽူႈၸီႉသင်ႇ(ညွှန်ကြားရေးမှူးချုပ်)သေ လိုဝ်ႈပေႃးၵၢၼ်ၵႂႃႇ။
ၽူႈပွင်ၵၢၼ် တႃႇတေပဵၼ် ႁူင်းလၢႆးၼႆႉတႄႉ လၢတ်ႈဝႃႈ ၶတ်းၸႂ်ဝႆႉ တႃႇတေပိုတ်ႇလႆႈ မိူဝ်ႈပီႊမႂ်ႇတႆး ၶၼ်ၶၼ်ဝႆးဝႆးၼႆယဝ်ႉ။ လႆႈႁူႉဝႃႈ ၵျွင်းၸေႃးတီႉၵဝ်ႇၼႆႉ လႆႈၵေႃႇသၢင်ႈမႃး ၸဵမ်မိူဝ်ႈပၢၵ်ႇပီႊပၢႆသေ မိူဝ်ႈလဵဝ် ႁွင်ႈၵၢၼ်ၶူၼ်ႉၶႂႃႉၾၢႆႇပိုၼ်း လူင်ပွင်ႊၸိုင်ႈၶဝ် ယိုၼ်ယၼ်ဝႆႉပဵၼ် ၶူဝ်းၵဝ်ႇၶူဝ်းမွၼ်ဢၼ်ၼိူင်ႈလႄႈ တၢင်းၼွၵ်ႈမၼ်းတႄႉ ဢမ်ႇၸၢင်ႊမူၼ်ႉမႄး၊ တေဝႆႉမိူၼ်ၵဝ်ႇ၊ တေမူၼ်ႉမႄးၵႂႃႇ တၢင်းၼႂ်းၵွၺ်းၼႆယဝ်ႉ။
