ယုင်းၶဵဝ်

ၵေႃလိၵ်ႈလၢႆးလႄႈၾိင်ႈငႄႈတႆး မိူင်းၸေႊလၢၼ်ႉ ၸေႊဝဵင်းမူႇၸေႊ မိူင်းတႆးပွတ်းႁွင်ႇ ႁဵတ်းပွႆးလိုဝ်ႈပၢင်သွၼ်လိၵ်ႈလၢႆးတႆး ၶၢဝ်းမႆႈ မိူဝ်ႈဝၼ်းထီႈ 11.7.2010 ဝၼ်းတိတ်ႉ။ ပၢင်လိၵ်ႈၼႆႉ  တႄႇၸဵမ်မိူဝ်ႈ ဝၼ်းတီႈ 25 လိူၼ်ဢေႇပရလ်ႇ 2010 သေ တွပ်ႇလိၵ်ႈၵႂႃႇ မိူဝ်ႈဝၼ်းတီႈ 5 လိူၼ်ၸုၼ်ႇ 2010 ၼၼ်ႉ။ ပၢင်လိၵ်ႈတင်းသဵင်ႈမီး 6 ပၢင်သေ 5 ပၢင် သွၼ်လိၵ်ႈတူဝ်မူၼ်း လုၵ်ႈႁဵၼ်းမီး 223 ၵေႃႉ၊ မႃးတွပ်ႇ 111 ၵေႃႉ။ 1 ပၢင်သမ်ႉ သွၼ်လိၵ်ႈ တူဝ်ယၢဝ်း ( ထူဝ်ႇငွၵ်ႈ ) လုၵ်ႈႁဵၼ်းမီး 15 ၵေႃႉ၊ မႃးတွပ်ႇ 5 ၵေႃႉ။ မေႃသွၼ်ၸိူဝ်းပူင်သွၼ်ပၼ်သမ်ႉ မီး 22 ၵေႃႉ (ၸၢႆး - 19 ၵေႃႉ၊ ယိင်း - 3 ၵေႃႉ)။ ပၢင်လိၵ်ႈတူဝ်မူၼ်း လႆႈႁဵၼ်းၵႂႃႇတီႈ မၢၼ်ႈသၢႆးၶၢဝ်၊ ပွၵ်ႉဝၼ်းဢွၵ်ႇ၊ ပွၵ်ႉၸၢၼ်း၊ ပွၵ်ႉႁွင်ႇ လႄႈ ပွၵ်ႉၽၢႆႇတူင်ႊ မိူင်းၸေႊလၢၼ်ႉ။ ပၢင်လိၵ်ႈတူဝ်ယၢဝ်း ( ထူဝ်ႇငွၵ်ႈ ) ပဵၼ်တီႈ လုမ်းၵေႃလိၵ်ႈ မိူင်းၸေႊလၢၼ်ႉၵွၺ်း။

တီႈပွႆးလိုဝ်ႈပၢင်ၼႆႉ ၽူႈၼၢမ်းၼႃႈလူင် လုင်းယွတ်ႈသႅင်မၢၼ်ႈသၢႆး မိူင်းၸေႊလၢၼ်ႉ သင်ႇလၢတ်ႈဝႃႈ ၸိူဝ်ႉမူင်ႈၵေႃႈ မူင်ႈပႅင်း၊ ၸိူဝ်ႉမႅင်းၵေႃႈမႅင်းႁၵ်ႉ။ မႆႉသိုပ်ႇမႆႉ၊ ၵူၼ်းသိုပ်ႇၵူၼ်း ၼႆလႄႈ ၸိူဝ်ႉတႆးၵေႃႈ သင်ဝႃႈတႆးဢမ်ႇမေႃႁၵ်ႉၼႆ တေဢမ်ႇမီးၽႂ်မႃးသိုပ်ႇႁၵ်ႉႁဝ်း ႁဵတ်းပၼ်ႁဝ်း လွင်ႈတေသိုပ်ႇပဵၼ်တႆးၵႂႃႇမိူဝ်းၼႃႈ။ ၵွပ်ႈၼႆ လွင်ႈၵၢၼ်သွၼ်လိၵ်ႈတႆးပၼ်လုၵ်ႈဢွၼ်ႇတႆး ႁႂ်ႈမေႃလိၵ်ႈတႆးၼႆၵေႃ ပဵၼ်ၵၢၼ်လူင် တႃႇသိုပ်ႇ ပဵၼ်တႆးထႅင်ႈမိူဝ်းၼႃႈယဝ်ႉ။ လိုၼ်းသုတ်း လၢတ်ႈဝႃႈ သိုပ်ႇႁဵတ်းၵၢၼ်ႁဝ်း တႃႇႁႂ်ႈၶိုၼ်ႈယႂ်ႇ မႂ်ႇသုင် ၵႂႃႇၼၼ်ႉတေႉ တေလႆႈမီးပုၼ်ႉၽွၼ်းၼိူဝ်မႃႇ သူၵဝ်ႁဝ်းႁႃး ၸိူဝ်းတိုဝ်ႉမီးၸႂ် သုတ်ႇဢဝ်လူမ်း   ၵူႊၵေႃႉယူႇယဝ်ႉသေ ၶွတ်ႇယွတ်ႈၶေႃႈၵႂၢမ်းမၼ်းၸဝ်ႈၵႂႃႇ။

သိုပ်ႇသေ ႁူဝ်ပဝ် ၵေႃလိၵ်ႈလၢႆးလႄႈၾိင်ႈငႄႈတႆး ၸေႊဝဵင်းမူႇၸေႊ ၸၢႆးၸဝ်ႉ သင်ႇလၢတ်ႈ ဝႃႈ လုၵ်ႈဢွၼ်ႇဢၼ်မူဝ်တူဝ်ႇမၢၵ်ႇၶၢင်ႇ ၸွမ်းၵဵဝ်ႇဝဵင်း၊ မူဝ်ပႃးထူင်ၵၢင်ႇၵူင်ႊယိူဝ်းလူၵ်ႈယိူဝ်းလူ ၸွမ်းႁၢဝ်းႁူၺ်ႈႁၢဝ်းလွႆတီႈမိူင်းၸေႊလၢၼ်ႉႁဝ်းၵေႃႉ ၸၢင်ႊမူဝ်ပဵၼ်လႆႈ ၽူႈယႂ်ႇၵူၼ်းလူင်သေ မႃးလၢတ်ႈၶူဝ်ႈၵၢမ်း ၾၢႆႇၼႃႈၵူၼ်းတင်းၼမ်ယူႇ။ လုၵ်ႈဢွၼ်ႇၵူဝ်ႉၼၼ်ႉ မၼ်းၶတ်းၸႂ် ဢဝ်လိၵ်ႈ လႄႈၸင်ႇၸၢင်ႊပဵၼ်လႆႈမႃးၼင်ႇၼႆ။ ၵွပ်ႈၼႆ လုၵ်ႈဢွၼ်ႇတီႈဝၢၼ်ႈၵေႃႈ ၸၢင်ႊပဵၼ်မႃးလႆႈ ၵူၼ်းလူင်ယူႇၼႆ ၶွတ်ႇယွတ်ႈၶေႃႈၵႂၢမ်းမၼ်း။