ၵေႃလိၵ်ႈလၢႆးလႄႈၾိင်ႈငႄႈတႆး ၸၼ်ႉၸွမ်တင်းလူင် ဝဵင်းလိူဝ်ႇ ၶဝ် ဢွၵ်ႇၶၢဝ်းတၢင်းပွတ်း ထိုင်ဝဵင်းပၢင်ႇဢူးသေ ၸတ်းႁဵတ်း ပွႆးႁပ်ႉတွၼ်ႈ လုၵ်ႈႁဵၼ်းမႂ်ႇ တွၼ်ႊတႃႇ ၶၢဝ်းႁဵၼ်းလိၵ်ႈ 2009-2010 ၼၼ်ႉ မိူဝ်ႈဝၼ်းတီႈ 7 လိူၼ်ၸူႇလၢႆႇ။
မိူဝ်ႈဝၼ်းတီႈ 7 ၵၢင်ၼႂ်ၸဝ်ႉၼၼ်ႉ လုၵ်ႈႁဵၼ်းၶဝ် ဢွၼ်ၵၼ်မႃးတွမ်ႊၵၼ် တီႈဝၢင်း မုၵ်ႉၸုမ်းၶႅၵ်ႇလီပၢင်ၸႃႉသေ ဢဝ်ၵႃးလူင် Express သၢမ်လမ်း၊ ၵႃး Jeep သွင်လမ်း ဢွၵ်ႇၶၢဝ်းတၢင်းၸူး ဝဵင်းပၢင်ႇဢူး။ ဢဵၼ်ႁႅင်းလုၵ်ႈႁဵၼ်းပႃး 180 ပၢႆ။ ၼႂ်းၵႃႊ 180 ၼၼ်ႉ ပႃးလုၵ်ႈႁဵၼ်းမႂ်ႇ ပီႊၼိူင်ႈ 100 ပၢႆ။ ၽူႈပွင်ၵၢၼ်သမ်ႉ ပႃး 16 ၵေႃႉ။ လႆႈႁူႉဝႃႈ ပီႊၼႆႉတႄႉ မေႃသွၼ်ၶဝ် ဢမ်ႇပဵၼ်ၸွမ်းသေၵေႃႉလႄႈ လုၵ်ႈႁဵၼ်းပီႊလိုၼ်းသုတ်းၶဝ်တင်း ၽူႈၼၢမ်းၼႂ်းၶဝ် လႆႈဢွၼ်ႁူဝ်ဢွၵ်ႇမႃး။
ဢွၼ်တၢင်းသုတ်း ဢွၼ်ၵၼ်ၵႂႃႇလႄႇ ၽြႃးပျီႇၶျိတ်ႉ ႁိမ်းဝၢၼ်ႈယင်ႇငႄႈ။ ယဝ်ႉၵေႃႈ လႆႈၵႂႃႇလႄႇတီႈ သူၼ်သိူဝ်းလူင်မၢၼ်ႈမိူင်းၵၢၼ်ႇတေႃႇၵျီးၼၼ်ႉ။ တီႈသူၼ်သိူဝ်းလူင်ၼၼ်ႉတႄႉ ဢွၼ်ၵၼ်လဵၼ်ႈတၢင်းမူၼ်ႊၵၼ်သေ လိူၵ်ႈၸၢႆးငၢမ်းၼၢင်းငၢမ်း တွၼ်ႊတႃႇ ပီႊ 2010 ၼၼ်ႉ။
ၸိူဝ်းလႆႈထုၵ်ႇလိူၵ်ႈပဵၼ် ၸၢႆးငၢမ်းၼၢင်းငၢမ်းၶဝ်ၸမ်း King ၸၢႆးၼုမ်ႇသႅင် (ပီႊၼိူင်ႈ Physics ၊ ၼမ်ႉၶမ်း)၊ Queen ယိင်းလၢဝ်ဢွမ် (ပီႊၼိူင်ႈ Law ၊ မူႇၸေႊ)၊ Fashion King ၸၢႆးသႅင်မိူင်း (ပီႊၼိူင်ႈ Physics ၊ ဝဵင်းလိူဝ်ႇ) လႄႈ Fashion Queen ၼၢင်းသႅင်ယွမ် (ၼမ်ႉၶမ်း) ၶဝ်ယဝ်ႉ။
လုၵ်ႈႁဵၼ်းပီႊလိုၼ်းသုတ်း ၸၼ်ႉၸွမ်ပၢႆးၸၢင်ႊၵေႃႉၼိူင်ႈလၢတ်ႈတႄႉ "မိူဝ်ႈပီႊၵၢႆၼၼ်ႉ မီးၵူၼ်း 200 ပၢႆ။ ပီႊၼႆႉတႄႉဢေႇၵႂႃႇတေႉ။ ထၢင်ႇတႄႉ ၵွပ်ႈပိူဝ်ႈ ႁဝ်းဢွၵ်ႇၶၢဝ်းတၢင်းမႃး ပၢင်ႇဢူးၵေႃႈဢမ်ႇႁူႉယဝ်ႉ။ ပၢင်ႇဢူးၼႆႉ ပိူၼ်ႈၵႆႉမႃးလႄႇလႄႈ ၵူၼ်းယၢမ်ႈၽႅဝ်ၵေႃႈၼမ်ၼႃႇ" ၼႆ။
