မိူဝ်ႈလိူၼ်မေႇ 2010 ၼၼ်ႉ ၼႂ်းဝၢင်းဝတ်ႉပရီႉယတ်ႉတီႉ ဝၢၼ်ႈၵျွင်းၶမ်း ၸေႊဝဵင်းသႅၼ်ဝီ လႆႈၶုတ်ႉႁၼ် ၵွင်းမူးၵဝ်ႇ သွင်သူႇ လမ်ႉမိုဝ်း ပၢၼ်ႁူဝ်ပၢၵ်ႇပီႊသိပ်းၸဵတ်းၼၼ်ႉ။
ၵွင်းမူးၵဝ်ႇသွင်သူႇၼႆႉ မိူဝ်ႈၸဝ်ႉတႄႉ ပဵၼ်ၵွင်းလွႆဢွၼ်ႇဢၼ်ၼိူင်ႈသေ ၽႂ်ဢမ်ႇၾၢင်ႉႁူႉဝႃႈ တေပဵၼ်ႁွႆးၵွင်းမူးၵဝ်ႇ။ မိူဝ်ႈဝၼ်းလိူၼ်လပ်းၼၼ်ႉ လုင်းဢၢႆႈၵပ်ႉ ၸၢဝ်းၶိူဝ်းဝႃႉ သိုၵ်းမၢၼ်ႊထၢၵ်ႈ ၵေႃႉယူႇတီႈဝတ်ႉၼၼ်ႉ လဝ်ႊတီႈၸဝ်ႈသြႃႇသေ မိူဝ်းဝဵၵ်ႉၼိူဝ်ၵွင်းၼၼ်ႉ တႃႇၽုၵ်ႇမၢၵ်ႇၽိတ်ႉ။ မိူဝ်ႈၼၼ်ႉ လုင်းဢၢႆႈၵပ်ႉ ၵႂႃႇၵူၼ်ႇၺႃး ၵွၵ်းႁူဝ်ႁုၼ်ႇႁၢင်ႊၽြႃးလႄႈ ၸင်ႇလႆႈႁူႉဝႃႈ ပဵၼ်ႁွႆးၵွင်းမူးၵဝ်ႇ။ ၸင်ႇႁွင်ႉ ၸဝ်ႈသင်ႇၶႃႇ ၵူၼ်းမိူင်းသေ ဢွၼ်ၵၼ်သိုပ်ႇၶုတ်ႉတူၺ်း လႆႈႁၼ်ပဵၼ် ၵွင်းမူးသွင်သူႇဝႆႉ။ ၼိူင်ႈသူႇ ၼိူင်ႈသူႇၼႆႉ မီးႁုၼ်ႇႁၢင်ႊၽြႃးပဵၼ်ၸဝ်ႈ သိပ်းသွင်သူႇၼင်ႇၵဝ်ႇ။ ဝႅပ်ႇယၢင်ႇၵေႃႈ ဢမ်ႇမိူၼ်ၵၼ်။
ၵဵဝ်ႇလူၺ်ႈ လွင်ႈၵွင်းမူးၵဝ်ႇၼႆႉ ၽၢႆႇၸဝ်ႈၼႃႈတီႈ ၸၼ်ႉၸေႊဝဵင်းၶဝ်ၵေႃႈ မႃးတူၺ်းယဝ်ႉသေ ၽူႈၵႂၢၼ်းတိူင်းၵေႃႈ တေမႃးယဵမ်ႈတူၺ်းၵွၼ်ႇၼႆ။
တေႃႈလဵဝ်တႄႉ ၵူၼ်းဝၢၼ်ႈႁိမ်းႁွမ်းၶဝ် ဢွၼ်ၵၼ်မႃးဢဝ်ၵူႉသူဝ်ႇ ၸွႆႈၵၼ်ၶုတ်ႉ၊ ၵုမ်းလုမ်းလႃး ၵွင်းမူးသွင်သူႇဝႆႉ။ ၵၢင်ၸႂ်ၸဝ်ႈသြႃႇတႄႉ ဢၢၼ်းမႄးၵုမ်းၶိုၼ်းၼႆ။
ဢွင်ႈတီႈၵျွင်းၶမ်းၼႆ့ မိူဝ်ႈၵွၼ်ႇႁွင်ႉဝႃႈ ဝဵင်းၸၢၼ်း ၼႆသေ ယၢမ်ႈပဵၼ်ဢွင်ႈတီႈ ၸဝ်ႈၾႃႉသႅၼ်ဝီၶဝ် ၼင်ႈႁေႃမႃးၼၼ်ႉ တီႈၼိူင်ႈယဝ်ႉ။
