ၵၢပ်ႈပၢၼ် ယၢမ်းမိူဝ်ႈလဵဝ်ၼႆႉ ဢိၼ်းထႂ်းၼႅတ်ႉၼႆႉ ပဵၼ်သဵၼ်ႈတၢင်းလူင် ဢၼ်ၶၢဝ်ႇလုမ်ႈၾႃႉ သူၼ်သၢၼ်လႆလူင်းဝႆႉလႄႈ ပဵၼ်ဢၼ် ၶိုၵ်ႉတွၼ်းလိူဝ်သေ ၵူၼ်းၸိူဝ်း ဢိင်ပိုင်ႈသိုဝ်ႇၶၢဝ်ႇၶဝ် လႆႈဝႆႉၵႃႊၶၼ်သေ တၢင်ႇၸိူဝ်းတၢင်ႇဢၼ်ယူႇယဝ်ႉ။
ၵူၺ်းၵႃႊ ဢိၼ်းထႂ်းၼႅတ်ႉၼႆႉ မၼ်းလွတ်ႈလႅဝ်း တႃႇၵူႊၵေႃႉ ၵူႊၵူၼ်းလႄႈ လဵၵ်ႉၼုမ်ႇ သၢမ်ပၢၼ်ၸဵတ်းသႅၼ်း ၸၢႆးယိင်းသေ ဢမ်ႇၵႃး ၵူၼ်းၸိူဝ်းပၢၼ် သိၵ်ႉႁိၵ်ႉ ၸူဝ်ႊၶူပ်ႇ ၸိူဝ်းသိပ်းႁႃႈ သိပ်းႁူၵ်းၶဝ်ၵေႃႈ ဢွၼ်ၵၼ် သူၼ်ၸႂ်သေ ၸႂ်ႉတိုဝ်း ဢိၼ်းထႂ်းၼႅတ်ႉ မႃးၼမ်ဝႆႉယူႇယဝ်ႉ။ ၼိူဝ်ဢိၼ်းထႂ်းၼႅတ်ႉၼႆႉ ၸၢင်ႊလၢတ်ႈတေႃႇၵၼ်၊ ၸၢင်ႊၽႄၵၼ် လွင်ႈတၢင်းႁူႉၽႂ်မၼ်းလႆႈလႄႈ ပဵၼ်ဢၼ်ပၼ် ၽွၼ်းလီပုၼ်ႈပၢင်ႈဝၢၼ်ႈမိူင်း သေဢမ်ႇၵႃး ၸၢင်ႊယုၵ်ႉတင်ႈလႆႈ ၼမ်ႉၵတ်ႉၵူၼ်းလႄႈ ပဵၼ်ဢၼ်လမ်ႇလွင်ႈ တႃႇၵူၼ်းၶိူဝ်းမႃးယဝ်ႉ။ ဢိင်ႇၼိူဝ် ဢိၼ်းထႂ်းၼႅတ်ႉၼႆႉသေ ၸၢင်ႊလႆႈၽွၼ်းလီ မၼ်းၼမ်လႄႈ ၵူၼ်းၶိူဝ်းၽႂ်မၼ်း ထုၵ်ႇလီ လဵပ်ႈႁဵၼ်း ၸႂ်ႉတိုဝ်းၵႂႃႇယူႇယဝ်ႉ။
တႃႇတေၸႂ်ႉတိုဝ်း ဢိၼ်းထႂ်းၼႅတ်ႉၼႆႉ မၼ်းဢမ်ႇၸႂ်ႈ လွင်ႈလီၵူဝ်လႄႈ ၵူၼ်းၸိူဝ်းပၢၼ်သိၵ်ႉႁိၵ်ႉၶဝ်ၵေႃႈ သူၼ်ၸႂ်တူင်ႉတိုၼ်ႇသေ ယိပ်းတိုဝ်း ဢီးမဵလ်း လႄႈ ၶျႅတ်ႇထိင်ႇ ၵမ်ႈပႃႈၼမ်ယဝ်ႉ။ ပီႈၼွင်ႉၶႄႇ ဢၼ်ပဵၼ် ၸဝ်ႈႁၢၼ်ႉ Internet Café ၵေႃႉၼိူင်ႈလၢတ်ႈဝႃႈ “ၵူၺ်းၵႃႊ ၼႂ်းၵႃႈ ၵူၼ်းၸိူဝ်း ပၢၼ်သိၵ်ႉႁိၵ်ႉ ဢၼ်မႃးယိပ်းတိုဝ်း တီႈႁၢၼ်ႉၼႆႉတႄႉ လုၵ်ႈဢွၼ်ႇတႆး ဢမ်ႇပေႃးလႆႈႁၼ်” ၼႆလႄႈ ပဵၼ်ဢၼ်မွင်ၸႂ်၊ ၶီၸႂ် တႃႇၵူၼ်းၼုမ်ႇတႆးႁဝ်း ဝၼ်းတႃမိူဝ်းၼႃႈယဝ်ႉ။
ၶူၼ်ႉၶႂႃႉလဵပ်ႈႁဵၼ်းတူၺ်း ပၢႆးလဵပ်ႈႁဵၼ်း ၵူၼ်းၼုမ်ႇတႆးႁဝ်းၸိုင် ၵူၼ်းၼုမ်ႇတႆးႁဝ်း ၵမ်ႈပႃႈၼမ် တိုၵ်ႉပဵၼ် တၢင်းပဵၼ် ဢၼ်ၵူဝ်ပၢႆးၸၢင်ႊ ဢၼ်မႂ်ႇလႄႈ လွင်ႈဢမ်ႇယိပ်းတိုဝ်း ဢိၼ်းထႂ်းၼႅတ်ႉၼႆႉ ဢမ်ႇၵဵဝ်ႈလူၺ်ႈ လွင်ႈပၢႆးမၢၵ်ႈမီးယဝ်ႉ ၼႆ လႆႈႁူႉပွင်ႇၼင်ႇၼႆ။
ၵူၼ်းၼုမ်ႇတႆး ၵေႃႉဢၼ် ၶိုၼ်ႈလဵပ်ႈႁဵၼ်း ၸၼ်ႉၸွမ်ၶွမ်ႇၽိဝ်ႇထႂ်ႇ ၵေႃႉၼိူင်ႈ ပိုတ်ႇလၢတ်ႇၼေၵႂႃႇဝႃႈ “ၼႂ်းတူင်ႇဝူင်းတႆးၼႆႉ လွင်ႈတႃႇတေပၼ် ပိုၼ်ႉႁူႉ ၵဵဝ်ႈလူၺ်ႈ ပၢႆးၶွမ်ႇၽိဝ်ႇထႂ်ႇ ယင်းပႆႇႁၼ်မီး မေႃသွၼ်ဢၼ်ၵတ်ႉၶႅၼ်ႇ ၾၢႆႇၶွမ်ႇၽိဝ်ႇထႂ်ႇ၊ ႁူင်းသွၼ် ၾၢႆႇၶွမ်ႇၽိဝ်ႇထႂ်ႇ၊ ၾၢႆႇၶၢႆလႄႈၸွင်းၸေး ၶွမ်ႇၽိဝ်ႇထႂ်ႇ （Computer Sales & Services）၊ ႁၢၼ်ႉဢိၼ်းထႂ်းၼႅတ်ႉ” ၼႆယဝ်ႉ။
