ယုင်းၶဵဝ်

ပပ်ႉၼႆႉ ပဵၼ်သႅၼ်းပပ်ႉ ပိုၼ်းသုၼ်ႇတူဝ်တႅမ်ႈၵွၺ်း ၶွင် ၽူႈတႅမ်ႈလိၵ်ႈ မွင်ႇသူၺ်ႇႀႅတ်ႉ။ ၽူႈတႅမ်ႈလိၵ်ႈၼႆႉ ယၢမ်ႈပဵၼ် ၸဝ်ႈၼႃႈတီႈသိုၵ်း ထၢၼ်ႈသုင်ၵေႃႉၼိူင်ႈ။ ၸိုဝ်ႈတေႉမၼ်းပဵၼ် ၸဝ်ႈသိုၵ်းလူင် ၺုၼ်ႉသူၺ်ႇ (ဗိုလ်မှူးကြီးညွန့်ဆွေ)။

မၼ်းယၢမ်ႈႁၢပ်ႇၵၢၼ်သိုၵ်း ၼႂ်းမိူင်းတႆးမႃး ၼင်ႇ ၽူႈပွင်သိုၵ်း ထၢၼ်ႈသွင် (G-2) တီႈ ငဝ်ႈငုၼ်းပွင်ၵၢၼ်သိုၵ်းၶိုၵ်ႉတွၼ်း လႃႈသဵဝ်ႈ၊ ၽူႈၵွၼ်းတပ်ႉၵွင် ၶလယ(6) တႂ်ႈတပ်ႉၸုမ်းလူင် (99)၊ ၽူႈၵွၼ်းတပ်ႉၸုမ်း (ပိဝ်ႇႁႃႇ) လႄႈ ၵႅမ်ၽူႈၵွၼ်း တပ်ႉၸုမ်းလူင် (77) ၸိူဝ်းၼၼ်ႉမႃး။

ၼႂ်းပပ်ႉၼႆႉ ပႃးဝႆႉ လွင်ႈတူဝ်ထူပ်း ၽူႈတႅမ်ႈလိၵ်ႈ ၸဝ်ႈသိုၵ်းလူင် ၺုၼ်ႉသူၺ်ႇ ၸိူဝ်းလႆႈတေႃႇသူႈၵၼ် တင်းတပ်ႉသိုၵ်း ပႃႇတီႇၶွမ်ႇမိဝ်ႇၼိသ်ႉမိူင်းမၢၼ်ႊ (ပၵပ)ၶဝ် ၵမ်ႈၼမ်။ မိူၼ်ၼင်ႇ လွင်ႈပၵပၶဝ် မႃးတိုၵ်း ဝဵင်းမူႇၸေႊ ၵမ်းဢွၼ်တၢင်းသုတ်း (1975)၊ လွင်ႈသိုၵ်း ပၵပၶဝ် မႃးတိုၵ်းယိုတ်းဢဝ်လႆႈ မိူင်းမိတ်ႈ တင်းဝဵင်း (1977)၊ လွင်ႈ တပ်ႉၸုမ်းလူင်(77) ၶွင်တပ်ႉသိုၵ်းမၢၼ်ႊ ထူဝ်းသိုၵ်း တိုၵ်းဢဝ် ၼႃႈလိၼ် မေႃႇၾႃႉ တႃႇတေလွၵ်ႇငိူတ်ႈ ငဝ်ႈငုၼ်း ပႃႇတီႇၶွမ်ႇမိဝ်ႇၼိသ်ႉမိူင်းမၢၼ်ႊ ဢၼ်ပၵ်းဝႆႉ တီႈပၢင်သၢင်း ၸိူဝ်းၼၼ်ႉယဝ်ႉ။ ၼွၵ်ႈသေၼၼ်ႉ ၸဝ်ႈသိုၵ်းလူင် ၺုၼ်ႉသူၺ်ႇ တႅမ်ႈပႃး လွင်ႈမၼ်း လႆႈၵႂႃႇတိုၵ်းယိုတ်းဢဝ် ငဝ်ႈငုၼ်း ၸုမ်းၵႃႇၵွႆႇယေးၵူဝ်းၵၢင်ႉ ဢၼ်လေႃႇသျိင်းႁၢၼ်ႇ ဢွၼ်ႁူဝ်၊ ဢၼ်ႁူမ်ႈႁွမ်းၵႂႃႇ တင်းတပ်ႉသိုၵ်းၸိုင်ႈတႆးၼၼ်ႉၵွၼ်ႇ။

ၼႂ်းၸူဝ်ႊ သိပ်းပီႊၼႆႉ ၸဝ်ႈၼႃႈတီႈသိုၵ်းမၢၼ်ႊ ၸိူဝ်းလိုဝ်ႈၵၢၼ် တေႃႇထိုင်ထၢၼ်ႈ ၸွမ်သိုၵ်းၶဝ် ဢွၼ်ၵၼ် တႅမ်ႈတူဝ်ထူပ်း ပၢၼ်ၶဝ် လႆႈႁၢပ်ႇၵၢၼ်သိုၵ်း ပိုၼ်ႊဢွၵ်ႇပဵၼ်ပပ်ႉမႃးတင်းၼမ်။ ၶဝ်ၵမ်ႈၼမ်သမ်ႉ လႆႈႁၢပ်ႇၵၢၼ်သိုၵ်းမႃး ၼႂ်းမိူင်းတႆးလႄႈ ၼႂ်းတူဝ်ထူပ်းၶဝ်ၼၼ်ႉ ပႃးဝႆႉလွင်ႈပိုၼ်းသိုၵ်းၸိုင်ႈတႆး ပွတ်းဢွၼ်ႇတွၼ်ႊၼိူင်ႈလႄႈ ပဵၼ်တၢင်းၵမ်ႉၸွႆႈ တႃႇၽူႈလဵပ်ႈႁဵၼ်းၶဝ်ဝႆႉ။ ပပ်ႉၸိူဝ်း ဢွၵ်ႇမိူဝ်ႈၸဝ်ႉၼၼ်ႉတႄႉ လႆႈတႅမ်ႈပႃး မၢႆတပ်ႉ တႅတ်ႈတႅတ်ႈၼႅတ်ႈၼႅတ်ႈသေတႃႉ ပပ်ႉၸိူဝ်း ဢွၵ်ႇမႃး ၼႂ်းပီႊ 2009 တႄႉ ဢမ်ႇလႆႈႁၼ်ပႃးမၢႆတပ်ႉသေ ဢိတ်ႇဢွၵ်ႇမႃး မိူၼ်ၼင်ႇ ၶလယ(-) ၼႆၵွၺ်းလႄႈ ပဵၼ်ဢၼ်ၵႂင်ၸႂ် တႃႇၽူႈလူလိၵ်ႈၶဝ်ဝႆႉယူႇယဝ်ႉ။

ၸိုဝ်ႈပပ်ႉ ကဒူးမမှမော်ဖသို့ (လုၵ်ႉတီႈၵထူးမႃႉ တေႃႇထိုင်မေႃႇၾႃႉ)
ၽူႈတႅမ်ႈ မောင်ဆွေသက် (မွင်ႇသူၺ်ႇႀႅတ်ႉ)
ပိုၼ်ႊဢွၵ်ႇ ပြည့်စုံ စာအုပ်တိုက်၊ ရန်ကုန် (ႁူင်းၵၢၼ်ပပ်ႉလိၵ်ႈ ပျီႉၸူင်ႇ တႃႈၵုင်ႈ)
ပီႊ 2009
ၼႃႈလိၵ်ႈ 461 ၼႃႈ
ၵႃႊၶၼ် 6,000 ပျႃး