ယုင်းၶဵဝ်

တႆး ယႃႇႁဵတ်းတႆးလိုမ်းတူဝ် ၼွၼ်းၵူမ်ႈႁူဝ်သူႇယႃႈ
တႆး ယႃႇႁဵတ်းတႆးယူႇမဝ်ႊ သွၼ်ႁဵၼ်းဢဝ်လိၵ်ႈၼႃႈ
တႆး ယႃႇႁဵတ်းတႆးသုမ်းၵၢၼ်ႉ လႄႇႁႃၶၢၼ်ႉလုၵ်ႉလႃႈ
တႆး ယႃႇႁဵတ်းတႆးလိုမ်းၸၢတ်ႈ ဢမ်ႇမေႃလၢတ်ႈတႆးဝႃႈ

တႆး လူဝ်ႇပဵၼ်တႆးႁတ်းႁၢၼ် ဝႄႈယၢၼ်လွင်ႈသူႇယႃႈ
တႆး လူဝ်ႇပဵၼ်တႆးႁၵ်ႉၵၼ် ၸုင်ၸၼ်ႁႂ်ႈၶိုၼ်ႈၼႃႈ
တႆး လူဝ်ႇပဵၼ်တႆးၽွမ်ႉၵၼ် ႁႂ်ႈဢၼ်လွတ်ႈၼေးဝႃႈ
တႆး လူဝ်ႇပဵၼ်တႆးႁၵ်ႉၸၢတ်ႈ ၸွႆႈလၢတ်ႈၶိူဝ်းၶိုၼ်ႈၵႃႊ

ၵႆႉၽိုၵ်းတႅမ်ႈ တေတႅတ်ႈတေႃး
ၵႆႉလူႁေႃး တေတွင်းၼမ်
ၵႆႉတွင်ႈထၢမ် တေႁူႉၸေး
ၵႆႉၽုၵ်ႇမႄး တေၶိုၼ်းလီ
ၵႆႉသုၵ်ႈသီ တေၸိုၼ်ႈၸၢင်ႇ

ၶၢၼ်ႉႁဵတ်းၵၢၼ် ၸၢင်ႊၽၢၼ်ငိုၼ်း
ၶၢၼ်ႉသွၼ်ပိုၼ်း ႁၢမ်းတၢင်းႁူႉ
ၶၢၼ်ႉႁွမ်ၸူႉ သုမ်းသဵင်ႈႁၢႆ
ၶၢၼ်ႉတွင်းမၢႆ လႆႈဢၢႆပိူၼ်ႈဝၢႆးလိုၼ်း ... ?
"လုၵ်ႈတႆးၸိူဝ်းဢၼ် တိုၵ်ႉၼွၼ်းလပ်းယူႇၼၼ်ႉ
လုၵ်ႉတိုၼ်ႇလႄႈ ပႆႇတူၵ်းလိုၼ်း"