ႁွင်ႈၵၢၼ်ၽွင်းလူင်ၾၢႆႇယူႇလီ ပိုၼ်ႊၽၢဝ်ႇဝႃႈ မီးယႃႈယႃငဝ်ႈၶိူဝ်း 14 ၸွင်ႈ ဢၼ်ပိုၼ်ႊၶၢႆယူႇ ၼႂ်းလွၵ်းၵၢတ်ႇ မိူင်းမၢၼ်ႊၼႆႉ ပဵၼ်ယႃႈယႃ ၸိူဝ်းဢမ်ႇမႃးတၢင်ႇမၢႆၾၢင်ဝႆႉ။
ၵွပ်ႈၼႆ ဢမ်ႇၸၢင်ႊယိုၼ်ယၼ်လႆႈ လွင်ႈဝႃႈ ယႃႈယႃၸိူဝ်းၼႆႉ ၵတ်ႉဢမ်ႇၵတ်ႉ လီဢမ်ႇလီ ထုၵ်ႇဢမ်ႇထုၵ်ႇ ဢၼ်ဝႃႈၼၼ်ႉလႄႈ ပဵၼ်ယႃႈယႃ ၸိူဝ်းၵူၼ်းမိူင်း ဢမ်ႇထုၵ်ႇလီတိုဝ်းၵႅမ်းၼႆယဝ်ႉ။
ၼႂ်းယႃႈယႃငဝ်ႈၶိူဝ်း 14 ၸွင်ႈၼၼ်ႉ ပႃး ယႃႈယႃ ၸိူဝ်းႁဵတ်းဢွၵ်ႇၼႂ်း ၸေႊမိူင်းမွၼ်း 5 ၸွင်ႈ၊ တိူင်းတႃႈၵုင်ႈ ပႃး 3 ၸွင်ႈ၊ ၸေႊမိူင်းၶၢင် ပႃး 3 ၸွင်ႈ၊ မိူင်းတႆး ပႃး 2 ၸွင်ႈ လႄႈ ယႃႈယႃ ဢၼ်ဢမ်ႇႁူႉတီႈႁဵတ်းဢွၵ်ႇ ပႃး 1 ၸွင်ႈ။
ယႃႈယႃတႆး 2 ၸွင်ႈၼၼ်ႉၸမ်း
1. ယႃႈယႃမႅၵ်ႉၵလွင်ႇ မိၵ်ႈမႃႉလႅင်မိၼ် ၊ သြႃႇၸၢမ်ႇဢေး၊ ဝဵင်းၼမ်ႉၶမ်း လႄႈ
2. ယႃႈယႃမႅၵ်ႉၵလွင်ႇ မိၵ်ႈမႃႉလႅင်မိၼ်၊ ၸၢႆးဝုၼ်းသူၺ်ႇ ၼၢင်းၶမ်းယူင်ႇ၊ ပွၵ်ႉ(7)၊ ၼႃႈလိၼ်(5)၊ ဝဵင်းလႃႈသဵဝ်ႈ ၶဝ်ယဝ်ႉ။
လႆႈႁူႉဝႃႈ ၸၢႆးဝုၼ်းသူၺ်ႇ ၼၢင်းၶမ်းယူင်ႇ ၶဝ် ပဵၼ် လုၵ်ႈလၢင်း သြႃႇၸၢမ်ႇဢေး ၼမ်ႉၶမ်းၼႆယဝ်ႉ။
ၸွမ်းၼင်ႇ ပၵ်းပိူင်ၼႂ်းမိူင်းမၢၼ်ႊ ပေႃးတေတၢင်ႇမၢႆၾၢင် တႃႇႁဵတ်းၵၢၼ်ယႃႈယႃငဝ်ႈၶိူဝ်းၸိုင် ၵေႃႉတေႁပ်ႉပဵၼ် ၸဝ်ႈၶွင်ၼႃႈၵၢၼ်ၼၼ်ႉ တေလႆႈပဵၼ်ၵူၼ်းလူင်းႁဵၼ်း ႁူင်းႁဵၼ်း/ၸၼ်ႉၸွမ် ပၢႆးယႃႈယႃငဝ်ႈၶိူဝ်း ၸင်ႇၸၢင်ႊႁဵတ်း။ ဝၢႆးသေ ပၵ်းပိူင်ၼႆႉဢွၵ်ႇမႃး ၸဝ်ႈၶွင် ၵၢၼ်ယႃႈယႃငဝ်ႈၶိူဝ်းၶဝ် မၢင်ႊၸိူဝ်း လႆႈလႅၼ်ႈၵႂႃႇၶိုၼ်ႈႁူင်းႁဵၼ်းၼၼ်ႉ၊ မၢင်ႊၸိူဝ်းၵေႃႈ လႆႈပွႆႇလုၵ်ႈလၢၼ်ၶဝ် ၵႂႃႇၶိုၼ်ႈသေ ႁႂ်ႈလုၵ်ႈလၢၼ် ႁပ်ႉၸိုဝ်ႈၸဝ်ႈၶွင် ၼႃႈၵၢၼ်။ မၢင်ႊၸိူဝ်းသမ်ႉ ဢမ်ႇၸၢင်ႊၵႂႃႇၶိုၼ်ႈလႃးလႃးလႄႈ ဢမ်ႇပဵၼ်တၢင်ႇမၢႆၾၢင်သေ သိုပ်ႇႁဵတ်းဢွၵ်ႇယူႇ ပၵ်းၵဝ်ႇပိူင်ၵဝ်ႇမႃးလႄႈ ယႃႈယႃ 14 ၸွင်ႈၼႆႉ ၸင်ႇလႆႈထုၵ်ႇပိုၼ်ႊၽၢဝ်ႇၸိူင်ႉၼႆယဝ်ႉ။
