ယုင်းၶဵဝ်

တၢမ်းၶမ်ႈပိူၼ်ႈတႄႉ တေပဵၼ်ႁိုဝ်ဢမ်ႇႁူႉ။ တၢမ်းၶမ်ႈဢၢႆးႁႃးတႄႉ လႅတ်ႇပႆႇတူၵ်းၵေႃႈ လပ်းသိင်ႇဝႆႉယဝ်ႉ။ တႃႇ တေတႆႈၾႆးပိူင်းလႅင်းၼၼ်ႉ မၼ်းယိူဝ်ႇၾႆး တႃႇထႅမ်သႂ်ႇ ၼႂ်းၸၢၵ်ႈၾႆးၼၼ်ႉၵေႃႈ ဢမ်ႇသိုဝ်ႉဝႆႉ။ တဵၼ်းလူင်ၵေႃႈ ဢမ်ႇႁႃဝႆႉ။ ဢႅပ်ႇၾႆးဢၼ်ဝႃႈၼၼ်ႉၵေႃႈ ဢမ်ႇတွၼ်ႉၸွမ်ႇဝႆႉၼႂ်းထွင်း။ ၾႆးၾႃႉ ဢၼ်ပိူၼ်ႈပွႆႇမႃးၼၼ်ႉၵေႃႈ ဢမ်ႇမွင်း။ ပေႃးပဵၼ်လႆႈ ၶႂ်ႈတီႉဢဝ်မႅင်းႁိင်ႇႁွႆႈ ဢၢၼ်ႇႁူဝ်မိုၼ်ႇႁူဝ်သႅၼ်တူဝ်ႁေ ပွႆႇဝႆႉ ၼႂ်းၶွင်ႉဢၢႆႈႁႃး ႁႂ်ႈၶဝ် ၸွၼ်ႇမိၼ်ဝႆႉ။
"ႁဝ်းၸႂ်ဢမ်ႇလီတေႉဢိူဝ်ႈ၊ ႁဝ်းမိုတ်ႈသူ မိူၼ်တႆးၵေႃႉၵွၺ်း၊ ၵွပ်ႈသူႁေ ႁူဝ်ၸႂ်ႁဝ်း ဢမ်ႇတွၼ်ႉၼိုင်မႃး သေပွၵ်ႈ"
ၵမ်ႇၾႃႇပၼ်ႇဝႆႉ ၸဵမ်မိူဝ်ႈၵူၼ်းႁဝ်း ဢမ်ႇပႆႇမီး ဢမ်ႇပႆႇပဵၼ်မႃးၼၼ်ႉသေတႃႉ ပွၵ်ႈၼႆႉတႄႉ ပၼ်ႇႁႂ်ႈဢၢႆႈ ႁႃးလူမ်ႉထူၸွမ်း ၼင်လိၼ်ၵႂႃႇယဝ်ႉႁိုဝ် ဢမ်ႇႁူႉ။ ၸႂ်ဢၼ်လူမ်ႉထူၵႂႃႇၼၼ်ႉ ဢၢင်ႈပူၵ်းၶိုၼ်းၵေႃႈ ဢမ်ႇၸၢင်ႊ။ မၼ်းၵေႃႈ လႅပ်ႈဢမ်ႇဢၢၼ်းၸွႆႈပူၵ်း။
"ၵွပ်ႈသင်ၼႆ ႁဝ်းဢမ်ႇလႆႈႁူႉႁႃႉ"
"မိုတ်ႈမိူၼ်တႆးၵေႃႉၵွၺ်း ဢၼ်ဝႃႈၼၼ်ႉ ဢမ်ႇၸႂ်ႈၶေႃႈတွပ်ႇ တႃႇ'ၵွပ်ႈသင်' ဢၼ်ဝႃႈၼၼ်ႉႁိုဝ်"
"ထၢင်ႇဝႃႈ ဢမ်ႇပႆႇၵုမ်ႇထူၼ်ႈၼႆ"
ၽဵင်းႁိပ်ႉႁွပ်ႉၵေႃႈဢၢႆႈႁႃး ဢမ်ႇသူင်ထွမ်ႇ။ ပွပ်ႊၵေႃႈ ဢမ်ႇသူၼ်ၸႂ်။ ရွၵ်ႊတႄႉ ၶႅၼ်းၵႆ။ တေဝႃႈ လင်ႇၵႃႇလူင်မိူဝ်ႈၵွၼ်ႇၼႆၵေႃႈ ဢမ်ႇယၢမ်ႈထွမ်ႇ လီလီလႄႈ လီႁိုဝ် ၸႃႉႁိုဝ် ဢမ်ႇၸၢင်ႊလၢတ်ႈ။ ဢီႈသင်ၵေႃႈ ဢမ်ႇၶႂ်ႈထွမ်ႇ။ ထႅင်ႈသမ်ႉ ဢမ်ႇႁတ်းထွမ်ႇ ၶေႃႈတွပ်ႇဢၼ်မၼ်းတေတွပ်ႇလၢတ်ႈမႃးၼၼ်ႉ။ ၵၢမ်ႇလီ။ မၼ်းဢမ်ႇ တွပ်ႇသေၶေႃႈ။
"ႁဝ်းဢမ်ႇထၢင်ႇဝႆႉ သူတေလၢတ်ႈႁဝ်းမႃးၸိူင်ႉၼႆ"
"ႁဝ်းသမ်ႉ လႆႈသိူင်ႇဝႆႉမႃးႁိုင်ၼၢၼ်းယဝ်ႉၼႃႇ၊ ၸင်ႇၼႆႉ ၸင်ႇပဵၼ်လၢတ်ႈ"
"ႁူႉယူႇ၊ ႁဝ်းၼႆႉ ဢမ်ႇၶိုတ်းပဵင်း လမ်ႉၵတ်ႉၼၢင်းယိင်း ဢၼ်သူမုင်ႈမွင်းဝႆႉၼၼ်ႉ ဢမ်ႇၸႂ်ႈႁႃႉ"
ဢၢႆႈႁႃးၶွၼ်းႁူဝ်။ ၵူၺ်းၵႃႊ မၼ်းတိုဝ်လၢတ်ႈ
"ၸႂ်ႈယူႇ၊ သူယႃႇပေလႅၼ်"
ဢၢႆႈႁႃးၶွၼ်းႁူဝ်ၼၼ်ႉ ဢမ်ႇၸႂ်ႈပွင်ႇဝႃႈထဵင်ပၢၵ်ႈ ၶေႃႈမၢပ်ႇမႂ်မၼ်း။ ဢၢမ်း မၼ်းမေႃလၢမ်းႁူႉ ၸႂ်ဢၢႆႈႁႃး ၼၼ်ႉၵွၺ်း။
"သူလၢတ်ႈ ဢမ်ႇထၢင်ႇႁဝ်းတေလၢတ်ႈၸိူင်ႉၼႆႁေ သမ်ႉႁဵတ်းႁိုဝ်ႁူႉၼႃႇ"
မၼ်းဢမ်ႇတွပ်ႇသင်လႆႈၵမ်းလဵဝ်။ ၵူမ်ႈႁူဝ်ၵႂႃႇ။
"သူယႃႇပေႁၢင်ႈၵႂၢမ်းထၢမ်တေႃႇႁဝ်းၼႃ"
"ႁဝ်းတေဢမ်ႇတဵၵ်း ႁႂ်ႈသူတွပ်ႇၵွၺ်း"
ဢမ်ႇပဵၼ်လၢတ်ႈသင်ၵၼ်။ တဵတ်ႇယူႇတင်းႁိုင်။
"ႁဝ်းၸႂ်သုၵ်ႉၼႃႇ၊ ၶႂ်ႈမိူဝ်းယဝ်ႉ"
ၶႂ်ႈမိူဝ်းၵေႃႈ ဢမ်ႇၸၢင်ႊႁၢမ်ႈ။ မိူဝ်းလႄႈၼႆၵေႃႈ ဢမ်ႇသိူဝ်းဢွၵ်ႇ။ ပေႃးမၼ်းတေတူၺ်း မၢၵ်ႇတႃဢၢႆႈ ႁႃးတႄႉ တေၸၢင်ႊလၢမ်းႁူႉၸႂ်ဢၢႆႈႁႃး ဢမ်ႇၶႂ်ႈ ပၼ်မၼ်းမိူဝ်းၼၼ်ႉ။ ၵၢမ်ႇႁၢႆႉ။ မၼ်းဢမ်ႇလဵဝ်တူၺ်းမႃး မၢၵ်ႇတႃ ဢၢႆႈႁႃးသေဢိတ်း။ မၼ်းဢမ်ႇမီးၸႂ်ၶႂ်ႈလူ တၢင်းၶုၺ်ႉႁၼ် ဢၼ်မႃးထွင်ႇသႂ်ႇ တီႈမၢၵ်ႇတႃဢၢႆႈ ႁႃးၼၼ်ႉယူဝ်ႉ။ မၼ်းလၢတ်ႈ
"မိူဝ်းၼႃႈတေမႃး ႁႃးတေသိုပ်ႇႁဵတ်းၵေႃႉၵၼ်ၸိူင်ႉႁိုဝ်"
"ၼၼ်ႉတႄႉ မီးတီႈၵၢင်ၸႂ်သူတႅပ်းတတ်းၵွၺ်းၼႃႇ၊ ႁဝ်းဢမ်ႇၸၢင်ႊၸွမ်းၸိမ်သင်"
ၼႂ်းတၢမ်းၶမ်ႈ ၶွင်ဢၢႆႈႁႃးၼၼ်ႉ မၼ်းယၢင်ႈပႆၵႂႃႇႁေ တမ်းဝႆႉပၼ်ႁွႆးတိၼ် ပဵၼ်ယိုတ်ႈပဵၼ်သၢႆ။ တူၺ်း သၢႆတႃပေႃးဢမ်ႇသုတ်းလႆႈ။ ၶႂ်ႈႁူႉႁွႆးတိၼ်ၸိူဝ်းၼၼ်ႉ မီးတီႈသုတ်းႁိုဝ်၊ ပေႃးမီးၵေႃႈ တေသုတ်းတီႈလႂ်၊ တေသုတ်း တီႈႁိူၼ်းၶဝ်ႁႃႉ။ ၼၼ်ႉတႄႉ ဢမ်ႇႁူႉၸွမ်းလႆႈ။ ၶႂ်ႈႁူႉလႄႈ ၸွမ်းတူၺ်းသၢႆႁွႆးတိၼ်ၸိူဝ်းၼၼ်ႉ ႁိုင်ပဵၼ်လၢႆဝၼ်း ဢမ်ႇႁူႉ။ ၵူဝ်ၵႂင်တၢင်းလႄႈ ဢၢႆႈႁႃးၵဵပ်းသိမ်း ႁွႆးတိၼ်ၵႃႊႁၼ်လႆႈ။ ၵဵပ်းဝႆႉၵေႃႈ ပေႃးတဵမ်ထွင်းယဝ်ႉလႄႈ ဢမ်ႇ ၸၢင်ႊၵဵပ်းလႆႈထႅင်ႈ။ ႁွႆးတိၼ်ၸိူဝ်းၼႆႉ တေလႆႈၵႂႃႇထွၵ်ႇပႅတ်ႈတီႈလႂ်။ ၵႃးတၢင်ႇၽုၼ်ႇၵေႃႈ တေဢမ်ႇႁပ်ႉလႄႈ ဢမ်ႇၸၢင်ႊၵႂႃႇဝႆႉတီႈလႂ်။
မိူဝ်ႈတိုၵ်ႉၵဵပ်းႁွႆးတိၼ်ၸွမ်းတၢင်းၼၼ်ႉ ၽိတ်းတၢင်းႁေ ၽႅဝ်ၵႂႃႇတီႈဢၼ် ယၢမ်ႈၽႅဝ် ယၢမ်ႈဢႅဝ်ႇၼၼ်ႉ။ ၸႂ်ႈယူႇ။ မၼ်းၸၢင်ႊမီးယူႇ။ ၾၵ်းတူဢၼ် ဢဝ်သေႃးႁွႆႈဝႆႉၼၼ်ႉ ပႂ်ႉႁပ်ႉဢၢႆႈႁႃးဢၼ်ဝႃႈၼႆႉ ဢမ်ႇလၢၵ်ႇလၢႆး။ ပေႃးဢၢႆႈႁႃး ၵႂႃႇၸုၵ်းၼိူဝ်ၶူဝ်လႆဢုတ်ႇသဝ်ႈမွင် တီႈပၢၵ်ႇၼႃႈၾၵ်းတူလဵၵ်းၼၼ်ႉၸိုင် မိုဝ်းၶၢဝ်ၶၢဝ်ဢွၼ်ႇသွင်ၶွၼ် ၼၼ်ႉ ယၢမ်ႈမႃးၽုၺ်ႇပၼ်သေႇသေႇ။ ၵူၺ်းၵႃႊ ၵမ်းၼႆႉတႄႉ တႃသွၼ်ၶွၼ် ဢၼ်လုၵ်ႉၾႆးၼၼ်ႉ ႁပ်ႉတူၺ်းဢၢႆႈ ႁႃးဝႆႉ။
"မီးႁဝ်းၵေႃႉလဵဝ်ၵွၺ်း၊ ၽႂ်ဢမ်ႇပႆႇပွၵ်ႈမႃး"
ၸႂ်ႈယူႇ။ ႁိမ်းႁွမ်းၼႆႉၵေႃႈ လပ်းသိင်ႇဝႆႉတေႉယဝ်ႉ။ သဵင်လၢတ်ႈၵႂၢမ်းၵေႃႈ ႁၢမ်ႉၶႅင်ဝႆႉ။
"ပႂ်ႉၵမ်းၼိူင်ႈလႄႈ၊ ႁဝ်းတေၽုၺ်ႇပၼ်ယူႇ"
တူၺ်းမၼ်း လႅပ်ႈမၢင်ႉၽၢၼ်ႉႁႃ သေဢၼ်ဢၼ်ဝႆႉ။ ႁႃၵၢၵ်ႇသေႃးတႄႉ ဢမ်ႇၸႂ်ႈၵွၺ်း။ ၵၢပ်ႇသေႃးဢၼ် ၶႅၼ်ဝႆႉတီႈသဝ်ၼၼ်ႉ ဢၢႆႈႁႃးယင်းႁၼ်ယူႇ။ ယူႇၵမ်းၼိူင်ႈ လႆႈႁၼ် မၼ်းဢဝ်ပပ်ႉသီၶွင်ႇပပ်ႉၼိူင်ႈမႃးလႄႈ ဢၢႆးႁႃး တူၵ်းၸႂ်ၵႂႃႇၵမ်းလဵဝ်။ ဢၢႆႈႁႃး ဢမ်ႇႁတ်းသိုပ်ႇတူၺ်း။ ၵူမ်ႈႁူဝ်ပႅတ်ႈ။ ဢၢႆႈႁႃးႁူႉယူႇ။ ပပ်ႉၼၼ်ႉ ပဵၼ်ပပ်ႉဝွၵ်း ဢၢႆႈႁႃးၶဝ်ႁဵတ်းပိုၼ်ႊႁေ ယၢမ်ႈတွၼ်ႈပၼ်မၼ်းၼၼ်ႉ။
ငိၼ်းသဵင်သေႃးၽတ်ႉသႂ်ႇၵၼ် ...
ငိၼ်းသဵင်တိၼ်မၼ်းယၢင်ႈပႆမႃး ...
ငိၼ်းသဵင်မၼ်းၽုၺ်ႇသေႃး ...
ငိၼ်းသဵင်ၸၼ်ၾၵ်းတူလဵၵ်း။ ယဝ်ႉ တိၼ်ဢွၼ်ႇၼိူင်ႈၵူႈ ၶဝ်ႈမႃးတႂ်ႈတႃဢၢႆႈႁႃး။
"ႁိူဝ်ႇ ..."
သဵင်မၼ်းသုတ်းၵေႃႈ ဢၢႆႈႁႃးၵေႃႈ ပေႃးတၼ်းႁပ်ႉဢဝ်ပပ်ႉၼၼ်ႉယဝ်ႉ မိူဝ်ႈမိူဝ်ႈၵၼ်ယဝ်ႉ။ မၼ်းတင်း ဢၢႆႈႁႃးၵေႃႈ တဵတ်ႇယဵၼ်ဝႆႉ။ ႁိမ်းႁွမ်းၵေႃႈ တဵတ်ႇယဵၼ်ဝႆႉ။ ၼႂ်းႁိူၼ်းၵေႃႈ တဵတ်ႇယဵၼ်ဝႆႉ။ ၵၢင်ႁၢဝ်ၵေႃႈတဵတ်ႇ ယဵၼ်ဝႆႉ။ လၢဝ်ၶဝ်ၵေႃႈ ယူႇတဵတ်ႇတဵတ်ႇႁေ ပႂ်ႉတူၺ်းဢၢႆႈႁႃးၶဝ်သွင်ၵေႃႉဝႆႉ။
လွင်ႈဢၼ် လႆႈၼင်ႈသူတ်ႉၵေႃႇၾီႇ ၼႂ်းႁိူၼ်းၼႆႉ၊ လႆႈၵိၼ်မူႇၶဝ်ႈၸွမ်းၵၼ် ၼႂ်းႁိူၼ်းၼႆႉ၊ လႆႈဢုပ်ႇဢူဝ်း ၵၼ် ၼႂ်းႁိူၼ်းၼႆႉ၊ လႆႈယဝ်ႉယွၵ်ႇၵၼ် ၼႂ်းႁိူၼ်းၼႆႉ၊ တၢင်းယုမ်ႉဢွၼ်ႇ ၼႂ်းႁိူၼ်းၼႆႉ၊ သဵင်ၶူဝ်ဢွၼ်ႇၼႂ်းႁိူၼ်းၼႆႉ ဝွတ်ႈဝဝ်းႁၢႆၵႂႃႇလႂ်မူတ်း။ ၵူၺ်း တေၵိုတ်းဝႆႉၼႂ်းၽၼ်ႁိုဝ်ဢမ်ႇႁူႉ။
"ပေႃးၼၼ် ႁဝ်းတေမိူဝ်းယဝ်ႉ"
ၼွၵ်ႈသေၶေႃႈၼႆႉ ဢၢႆႈႁႃး ဢမ်ႇမီးၵႂၢမ်းသင် တေလၢတ်ႈ။ ယဝ်ႉ ဢမ်ႇမီးၽၼ် တႃႇမုင်ႈမွင်းထႅင်ႈ။
လုၵ်ႉတီႈၼိူဝ်တူၼ်ႈမႆႉလူင် ႁိမ်းတၢင်းၸွမ်းၾင်ႇၼမ်ႉမႄႈလူင်ၼၼ်ႉ မႂ်ႊမႆႉႁႅင်ႈသီလိူင်ၶဝ် တိုၵ်ႉႁူင်ႈ တိုၵ်ႉတူၵ်း တိုၵ်ႉပိဝ်ၸွမ်းလူမ်းဝႆႉ။ ၵူၺ်းၵႃႊ ပေႃးၾူၼ်မႃး တေၶိုၼ်းမႅၼ်းဢွၵ်ႇ ၾူၺ်းၼုမ်ႇ ယွတ်ႈၼုမ်ႇ မႂ်ႊၼုမ်ႇ မႃးယူႇဢၼ်ဝႃႈၼၼ်ႉ ၽႂ်ၸၢင်ႊထဵင်။ လုၵ်ႈဝၼ်း ဢၼ်တေဢွၵ်ႇမႃးမိူဝ်ႈၽုၵ်ႈၼၼ်ႉ တိုၵ်ႉႁူင်ႈၸွမ်းၵႂႃႇ တၢင်း တူၵ်းယၢမ်းလဵဝ်။

ဢွင်ႈတီႈယၢၼ်ၵႆတင်း ၵူၼ်းၸိူဝ်းတိုၵ်ႉၶူဝ်လဵၼ်ႈဢၢႆႈႁႃးယူႇၼၼ်ႉ ႁၢင်ႈႁႅၼ်းတႃႇႁဵတ်းပၢင်ၸႃႉႁူဝ်ၸႂ် ႁူၺ်ႇၼိူင်ႈယူႇ။ ၵူၼ်းၸိူဝ်းၼၼ်ႉ ပေႃးထိုင်ၵမ်း ၶဝ်မႃးၵေႃႈ တေမေႃႁွင်ႉႁႆႈယူႇဢမ်ႇႁၢင်ႉ။ ႁူဝ်ၸႂ်ဢၼ်တေ ၽင်ၼၼ်ႉ တေၸၢင်ႊၶိုၼ်းၶီးမႃးယူႇႁိုဝ် ဢၼ်ဝႃႈၼၼ်ႉ ပဵၼ်ဝႆႉႁူဝ်ၶေႃႈ တႃႇထဵင်ၵၼ် ဢုပ်ႇၵုမ်ၵၼ် ၼႂ်းၵႄႈၵၢင် ၵူၼ်းသူၼ်ၸႂ်ၶဝ်။ ပၢင်ၸႃႉၼၼ်ႉ တေဢမ်ႇမိူၼ်ပၢင်ၸႃႉႁူဝ်ၸႂ်ပိူၼ်ႈၵူႊပွၵ်ႈ။
ဢမ်ႇပႃးၵွၵ်း ...
ဢမ်ႇပႃးတဝ်ႈ ...
ဢမ်ႇပႃးသဵင်ႁွင်ႉႁႆႈ ....
ဢမ်ႇပႃးၼမ်ႉတႃ .... သဵင်တိင်ႇၵေႃႈ ယင်းတေဢမ်ႇပႃးၵွၼ်ႇ။ ယဝ်ႉ ၸိူဝ်းဢၼ်ပဵၼ်ၶိုၼ်ႈပၢင်ၸႃႉၼၼ်ႉ သမ်ႉ
ပပ်ႉပဝ်ႇဢၼ်တႅမ်ႈဝွၵ်းလဵၼ်ႈၼိူင်ႈပပ်ႉ
ၵမ်ၸိုမ်းသီငိုၼ်းဢၼ်မႂ်ႇ ဢၼ်လႆႈဝႆႉတီႈတၢင်ႇၵေႃႉ ၼိူင်ႈလူၼ်ႉ
လူတ်ႉၶိုင်ႈမိူင်းၶႄႇသီၶဵဝ် ၼိူင်ႈလမ်း
ဢႅပ်ႇငိုၼ်း ဢၼ်ပႃးၸေႈႁႃႈပျႃး ဢၼ်လႆႈဝႆႉတႃႇၵႃႊတႅမ်ႈႁၢင်ႊ
ပပ်ႉၵၢၼ်မိူင်းလႅင်ႊမိူင်း ၼိူင်ႈပပ်ႉ တင်း
ၼမ်ႉမႄႈလူင် ဢၼ်လႆၵႂႃႇတၢင်းၸၢၼ်းၼၼ်ႉ။ ၾၢင်ႉ ... ၵမ်ၸိုမ်းသီၶမ်း ဢၼ်ယၢမ်ႈၸွမ်ႇဝႆႉ တီႈၸမ်ႁူဝ် ၸႂ်ဢၢႆႈႁႃးၼၼ်ႉ သူင်ႇမီးဝႆႉၼႂ်းႁူင်းၼႄပိုၼ်း ယဝ်ႉ။
ဢၢႆႈႁႃးသူင်တူၺ်း ပွႆးပိတ်ႉမၢၵ်ႇၼင်လွမ်ႊတေႉတေႉ။ ၽိုၼ်လိၵ်ႈလွင်ႈမၢၵ်ႇၼင်လွမ်ႊ ဢၼ်လိူင်ႇတဵမ် မိူင်းၸိူဝ်းၼၼ်ႉ ၽိုၼ်လႂ်ၵေႃႈ ဢမ်ႇလွတ်ႈသိုဝ်ႉလူ။ ပေႃးတူၺ်းဢိၼ်းထႂ်းၼႅတ်ႉၵေႃႈ မၢင်ႉႁႃၶေႃႈမုၼ်း လွင်ႈမၢၵ်ႇ ၼင်လွမ်ႊၵမ်ႈၼမ်။ ၼႂ်းသႅင်ႇၼမ်ႉၼဵင်ႈဝၢၼ် ဢၼ်ပဵၼ်ၼင်ႈၵူႊၶမ်ႈၼၼ်ႉၵေႃႈ ပဵၼ်ဢုပ်ႇလွင်ႈမၢၵ်ႇၼင်လွမ်ႊ လွၼ်ႉလွၼ်ႉ။ ၵူၺ်းၵႃႊ ၶႂ်ႈယိုၼ်လွင်ႈၸုမ်းမၢၵ်ႇၼင်လွမ်ႊမိူင်းႁဝ်းတႄႉ ဢၢႆႈႁႃးဢမ်ႇပေႃးႁူႉလီ။
ၶၢဝ်ယၢမ်း ပွႆးပိတ်ႉမၢၵ်ႇၼင်လွမ်ႊလုမ်ႈၾႃႉ ၵိုၼ်းဢိုတ်ႉဢိုတ်ႉယူႇတင်းလူၵ်ႈ။ ဢၢႆႈႁႃးၼင်ႈပႂ်ႉတူၺ်း ပွႆးဢၼ်ၸုမ်းဢိင်ႊၵလႅၼ်ႊ တင်း ၸုမ်းၽေႃႊတၵီႊၶဝ် တေပိတ်ႉၼၼ်ႉ။ ၼႂ်းၵႃႊၸုမ်းပိတ်ႉမၢၵ်ႇၼင်လွမ်ႊ ၸိုင်ႈမိူင်းၸိူဝ်းၼၼ်ႉ ဢၢႆႈႁႃးပၼ်ႁႅင်း ၸုမ်းဢိင်ႊၵလႅၼ်ႊ။ ၵွပ်ႈသင်ပၼ်ႁႅင်းၼႆတႄႉ ဢမ်ႇမေႃလၢတ်ႈ။ ၵျိုၵ်ႈၼႃႇ ၵွၺ်း။ ပေႃးၶဝ်ပေႉမႃးၵေႃႈ လႆႈၸွၼ်ၸူမ်း။ ပေႃးၶဝ်သုမ်းၵေႃႈ လႆႈၶီၸႂ်တၢင်။ ၵွပ်ႈပိူဝ်ႈ မိူင်းၶဝ်ယၢမ်ႈမႃး ၽွင်းငမ်း မိူင်းႁဝ်းလႄႈ ၸင်ႇမီးသၢႆၼွင်ႇၵၢၼ်မိူင်းႁေ ၵျိုၵ်ႈႁိုဝ်ၼႆ လႆႈငမ်းငဝ်းဝႆႉ ႁင်းပိုဝ်ၸဝ်ႈ။
ၵၢမ်ႇႁၢႆႉ။ ၶမ်ႈၼၼ်ႉ ဢိင်ႊၵလႅၼ်ႊ သုမ်းႁႂ်ႈ ၽေႃႊတၵီႊၶဝ်ပႅတ်ႈ။ ၼွင်ႉၸၢႆးဢၢႆႈႁႃးတႄႉ ၸႂ်လမ်ႁေ လၢတ်ႈ
"လီၸင်းၽူႈၵုမ်းပၢင်ၼႃႇ၊ လီယွင်ႈမိုဝ်းရီႊၶႃႊတူဝ်ႊၼႃႇ"
ၵူၺ်းၵႃႊ ဢၢႆႈႁႃးတႄႉ ဢမ်ႇပဵၼ်ၶီၸႂ်ၸွမ်းသေဢိတ်း။ ဢမ်ႇတိူဝ်ႉၼိူဝ်ႉသေဢိတ်း။ ၵွပ်ႈပိူဝ်ႈ မိူဝ်ႈတၢမ်း ၶမ်ႈၼၼ်ႉ
သိူဝ်ႈသီၶၢဝ်
သိၼ်ႈသီသွမ်ႇၼုမ်ႇလၢႆးမွၵ်ႇ တင်း
မၢၵ်ႇႁူဝ်လႅင်လႅင်ဢွၼ်ႇ ၼိူဝ်လူတ်ႉၶိုင်ႈ ၵေႃႉယၢမ်ႈမိုတ်ႈတႃမႃးၸဵမ်ႁိုင်ၼၼ်ႉ ပၼ်သဵင်ႁွၼ်းႁေ ယုမ်ႉ ၼေတူင်ႉတၵ်ႉ ဢၢႆႈႁႃးၵႂႃႇ။ ၾၢင်ႉတိူၼ်တူၺ်း ပဵၼ်သီၶၢဝ်ဝႆႉ။