ယုင်းၶဵဝ်

ပွၵ်ႈၼိူင်ႈ ၸဝ်ႈဝူင်ႉႁေႃသႅင် လၢၼ်ႉၸဝ်ႈ ၶုၼ်လူင် (ၶုၼ်လူႇၽူင်း) ၽၢမ်းႁၢင်ႊ ထၢၼ်ႈၵူၼ်း ၸၼ်ႉၵၢင်သေ ၶဝ်ႈမႃး ၼႂ်းႁၢၼ်ႉတၢင်းၵိၼ် ဢၼ်ၸိုဝ်ႈသဵင်ယႂ်ႇ ၼႂ်းဝဵင်းတႃႉလီၼၼ်ႉ ဢၼ်ၼိူင်ႈ။ ပႃးမႃး လုၵ်ႈၼွင်ႈ သီႇႁႃႈၵေႃႉ။ ႁူဝ်ၼႃႈ လုၵ်ႈၼွင်ႈမၼ်း  ဢွၵ်ႇၵႂၢမ်းသင်ႇၸူး ၵူၼ်းၸိူဝ်း ၼင်ႈၵိၼ်ၼၼ်ႉ
"ၸင်ႇၼႆႉ တူႊၶၢတ်ႈဢဝ် ႁၢၼ်ႉလၢႆတင်းမူတ်းယဝ်ႉ။ ၸိူဝ်းသူ ဢွၵ်ႇႁၢၼ်ႉၵႂႃႇ တင်းမူတ်း"
ၸိူဝ်းၼင်ႈၵိၼ်ၼၼ်ႉ ဢမ်ႇႁၢၼ်ႉၸႂ်သေတႃႉ ၶဝ်ၵူဝ်ႁွၵ်ႇၵူဝ်လၢပ်ႇ ၶွင်လုၵ်ႈၼွင်ႈမၼ်းလႄႈ ဢွၼ်ၵၼ်ဢွၵ်ႇ ၵႂႃႇယူႇယဝ်ႉ။ ၵူၺ်းၵႃႊ ၵူၼ်းမႃႇမၼ်ႈႁႅင်းၵိုမ်း ၵေႃႉၼိူင်ႈတႄႉ ယင်ႊတိူဝ်ႉၼိူဝ်ႉ။ ႁဵတ်းမိူၼ် ဢမ်ႇလႆႈငိၼ်း သဵင်ၶဝ်သေ သိုပ်ႇၵိၼ်တၢင်းၵိၼ်ယူႇ။ ႁူဝ်ၼႃႈၵေႃႉၼၼ်ႉၸင်ႇ
"ဢၢႆႈ ... ၵဝ်တၢၼ်ႈ ယင်ႊၶဝ်ႈႁူမႂ်းႁႃႉ။ ဢွၵ်ႇၵႂႃႇ"
"မႂ်း ... ၵဝ်ၽႅဝ် ဢွၼ်တၢင်းသႃႊ။ ၵိၼ်ယင်ႊပႃႊဢိမ်ႇ ႁိုဝ်တေလုၵ်ႉ။ ၸင်ႇႁႃ ၽႅဝ်မႃးၵွၺ်း လိုပ်ႈပိူၼ်ႈ တၢၼ်ႇမႃ။ ႁၢၼ်ႉၶဝ်ၵႂၢင်ႈၶႆႉ သူႁႃႈႁူၵ်းၵေႃႉ ၶဝ်ႈမႃးၵိၼ် တေပဵၼ်သင်။ ယူႇလၢႆႊလၢႆႊ ယႃႇၶႂ်ႈပၢၼ်းၽိတ်းၵၼ်။ ၶႂ်ႈၵိၼ်သင် သင်ႇၵိၼ်။ ၵဝ်တိုၵ်ႉၵိၼ်ယူႇ ... ႁႂ်ႈၵဝ် လႆႈၵိၼ်လီလီလူႊ ..."
"သူပ်းၼမ်။ မႂ်းတေဢွၵ်ႇ ဢမ်ႇဢွၵ်ႇ"
"ယင်ႊဢွၵ်ႇ"
"ၵူၼ်းႁဝ်း ... ပေႃးယင်ႊၶႂ်ႈဢွၵ်ႇတူဝ်လိပ်းၵေႃႈ ဢွၵ်ႇတူဝ်တၢႆလႃႈ"
လုၵ်ႈၼွင်ႈၸဝ်ႈလူင်ၵေႃႈ လၢၵ်ႈလၢပ်ႇသေ ၶဝ်ႈၽၼ်းၶိင်းၼၼ်ႉ။ ၵူၺ်းၵႃႊ မၼ်းဢဝ် တႃမိုဝ်း၊ ငွၵ်းသွၵ်ႇ၊ ႁူဝ်ၶဝ်ႇ ၸိူဝ်းၼႆႉ လၼ်ႈၸွမ်းၽိဝ်လၢပ်ႇ ၶဝ်သေ ၽၢပ်ႉၽိပ်ႉၵမ်းဢႅၼ်ၼိူင်ႈ၊ ၵူၼ်းၸိူၼ်းထူၵႂႃႇသဵင်ႈ။ ၶိင်းၼၼ်ႉ ၶိုၼ်းမႃးၼင်ႈၵိၼ် တၢင်းၵိၼ်မၼ်းယူႇ။ ၽွင်းၼၼ်ႉ ပၢႆလႅမ်သေဢၼ်ဢၼ် သဵပ်ႇၸီး ၽႅဝ်ၶေႃး မၼ်းမႃး။ လႆႈႁၼ် ၵူၼ်းၵေႃႉၼိူင်ႈ ဢဝ်လၢပ်ႇၸင်ႈၶေႃးမၼ်းဝႆႉယူႇ။ ၶိင်းၼၼ်ႉ ၸၢဝ်ၽႅၼ်ႇၸဵတ်ႉသူပ်းမၼ်းသေ ...
"ၽွင်းတိုၵ်ႉၵိၼ်ဝၢၼ်ယူႇၼႆႉ လႆႈတၢႆၵေႃႈ ၵိုင်ႇယူႇ။ ၵူၼ်းႁဝ်း ၶႂ်ႈပဵၼ်ၸိူင်ႉႁိုဝ် ... ႁဵတ်းလႃႈ"
ၶုၼ်လူင်ၵေႃႈ ပဵၼ်ဢၼ်သူၼ်ၸႂ်ၼိူဝ်ၶိင်းၼၼ်ႉၵႂႃႇယူႇယဝ်ႉ။ သမ်ႉထႅင်ႈ လႆႈႁၼ်မၼ်း ဝႆႉတၢင်းတၢႆမိူၼ်ၵိၼ် ၶဝ်ႈလိုမ်ႇၼမ်ႉၵွၺ်း။ ၸဝ်ႈလူင် ယိုတ်းလၢပ်ႇမၼ်းဝႆႉၶိုၼ်း။ ၶဝ်ႈၼင်ႈတေႃႇၼႃႈၶိင်းၼၼ်ႉ ၼႂ်းၽိူၼ်လဵဝ်ၵၼ်။ သမ်ႉ ႁႂ်ႈလုၵ်ႈၼွင်ႈမၼ်း ၸိူဝ်းဢၼ်ပၢင်ႇၸိုၼ်ႈမႃးၼၼ်ႉ ဢွၵ်ႇၵႂႃႇပႂ်ႉတၢင်း ၼွၵ်ႈယဝ်ႉ။

"ဢိူၺ်း ... ၸဝ်ႈႁၢၼ်ႉ၊ ဢဝ်ၽၵ်း ဢၼ်ၶႅမ်ႉၶႅမ်ႉၸိူၺ်းမႃးလူႊ။ ၸဵမ်လဝ်ႈႁူဝ်ဢွင်းဢႅင်ႇၼိူင်ႈ"
ပေႃးဝႃႈ ၼမ်ႉယၢင်ၶဝ်ႈ ၽႅဝ်မႃးယဝ်ႉၵေႃႈ ငၢမ်ႁေႈၵိၼ်ဢိုၵ်ႉၼိူင်ႈသေ ၸဝ်ႈလူင်ၸင်ႇ
"ၼွင်ႉၸၢႆး ပဵၼ်ၵူၼ်းဝဵင်းလႂ်"
"တႃႉလီ၊ ၽၢႆႇႁွင်ႇဝၼ်းဢွၵ်ႇမိူင်း"
"ႁဵတ်းၵၢၼ်သင်"

"ၸၢင်ႊမႆႉ။ ၸိူဝ်ႉတိုၼ်းႁဝ်း ပဵၼ်ၸၢင်ႊမႆႉတင်းၶိူဝ်းယဝ်ႉ"
"ႁၢႆ ... မိူဝ်ႈၵႆႈ မႂ်းတႅၼ်းသႂ်ႇၵူၼ်းၵဝ် သမ်ႉပေႉမႃးလႅၼ်ႇ"
"လၢႆတႄႉ ပဵၼ်လၢႆးၶွင်ၶိူဝ်းႁိူၼ်းတူဝ်ႇတူႊသႃႊ။ လွၵ်းၸိူၺ်း ယင်ႊလႆႈမိူၵ်ႈၽႂ်၊ ပိူၼ်ႈၶီႇၼဵၵ်းၵေႃႈ ယင်ႈလႆႈ ၵူမ်ႈႁူဝ်"
ၽၵ်းဢုၼ်ႇဢုၼ်ႇမႆႈမႆႈၼႆၵေႃႈ ၽႅဝ်မႃးၼိူဝ်ၽိူၼ် ပဵၼ်တီႇပဵၼ်ထႅၼ်ႈ။ ၸိမ်းတူၺ်း သႃႈၶူမ်ၽွႆၼိူင်ႈသေ ၸဝ်ႈလူင်ၸင်ႇ
"ၼွင်ႉၸၢႆးၵဝ် ယင်ႊၶႂ်ႈႁဵတ်းၵေႃႉသိုၵ်းႁႃႉ။ တေပၼ်သူဝ်ငိုၼ်းၼမ်ဢိူဝ်ႈ"
"မိူဝ်ႈၵဝ်တိုၵ်ႉပဵၼ်မၢဝ်ႇထႅဝ်ႇၼၼ်ႉ ၵဝ်ယၢမ်ႈဝႃႈဢူႈတူႊ။ ဢူႈ ... လူင်ၸဝ်ႈ၊ လူင်လဵၼ်ႁဝ်းၶဝ် ႁဵတ်းၸၢင်ႊ မႆႉၵူႊၵေႃႉ။ ဢူႈႁဝ်းၵေႃႈႁဵတ်းၸၢင်ႊမႆႉ။ ႁၼ်ၽႂ်မၢၵ်ႈမီးလီပဵၼ်။ ၵဝ်တႄႉ ယင်ႊပဵၼ်လႆႈ။ ၸဝ်ႈလူင်တေမႄႇၶႂၢၵ်ႈ မၢၼ်ႈမိူင်း၊ ၶဝ်လူဝ်ႇၵူၼ်းသိုၵ်း။ ပေႃးတၢႆၵေႃႈၽီ၊ ပေႃးလီၵေႃႈၶမ်း။ ၵဝ်တႄႉ တေႁဵတ်းၵူၼ်းသိုၵ်းၵွၺ်းၶႃႈ ... ဢူႈ"
"ၽွင်းၼၼ် ဢူႈသူသမ်ႉဝႃႈႁိုဝ်" မၼ်းဝႃႈ
"လုၵ်ႈၸၢႆးၵဝ် ... ယႃႇဝႃႈ သိုၵ်းမိူင်းၼိူင်ႈၽၼ်းမိူင်းၼိူင်ႈလႃႈ၊ တေႃႈၵွၺ်းတူၺ်း ၵူၼ်းသွင်ၵေႃႉ ႁႅမ်ၵၼ် တၢႆဢွၼ်တၢင်းၵွၼ်ႇ။ သင်ဝႃႈ လုၵ်ႈၸၢႆးၵဝ် တင်းပိူၼ်ႈၽၼ်းၵၼ်၊ ပေႃးမႂ်းပေႉ မၼ်းတၢႆ။ ပေႃးမၼ်းပေႉ မႂ်းတၢႆ။ ဝႆႉဝႃႈမႂ်းပေႉလူႊ။ တႃႇမႂ်းတေဢွင်ႇပေႉ ၵူၼ်းလႆႈတၢႆၵေႃႉၼိူင်ႈ။ ဢူႈမႄႈၶဝ် တေလိူတ်ႇမႆႈ ၵွပ်ႈလုၵ်ႈၸၢႆးၶဝ်တၢႆ။ မေးမၼ်းၵေႃႈ တေလႆႈၶၢၼ်ၸႂ်။ လုၵ်ႈလၢင်းမၼ်းၵေႃႈ တေပဵၼ်ၵူၼ်းၽၢၼ်ဢူႈ။ မႂ်းတႄႉ တေထၢင်ႇမႂ်းပဵၼ် ၵူၼ်း ဢွင်ႇပေႉၵေႃႉၼိူင်ႈသေ မႃႇၶႅင်ႁႅင်းတႃႉယူႇ။ ဢၼ်ၼႆႉ ပဵၼ်လွင်ႈလီၸႂ်ၼိူင်ႈၵမ်းၵွၺ်း။ တႃႇတေလီၸႂ်ၼိူင်ႈၵမ်းၼႆႉ လႆႈဢဝ်လိူတ်ႈ၊ ၼမ်ႉတႃ မႃးလႅၵ်ႈဢဝ်ၸွင်ႇမၼ်းၵိုင်ႇ" ၼႆဢိူဝ်ႈ။

ၸဝ်ႈလူင် ၶွၼ်းႁူဝ်ၵႂႃႇႁၢႆးၼိူင်ႈ။ ပေႉမႃး တၢင်းဝူၼ်ႉတိုၼ်ႈ ၶီႈယၢၼ်ႈတၢၼ်ႇၼႆႉ။ ပေႃးယင်ႊမီး ပၢင်တိုၵ်း တေႁိုဝ်မီးလႅၼ်ႊမိူင်းၵႂၢင်ႈၶႂၢင်၊ ၸဝ်ႈဝူင်ႉႁေႃသႅင် ဢၼ်ဝႃႈၼၼ်ႉၵေႃႈ ႁိုတေမီးမႃးလႆႈ။ လၢႆ ... ၶိင်းၸၢင်ႊမႆႉ ၼႃႈ ငိူဝ်ႈၼႆႉ တေဢမ်ႇႁူႉ။ ၶိင်းၼၼ်ႉ ႁႅၼ်ၵၢင်းသူတ်ႉၼမ်ႉလဝ်ႈသေၵွၵ်းၼိူင်ႈ။ ယဝ်ႉၵေႃႈ
"ဢူႈတူႊ တင်းဝႃႈထႅင်ႈ။ ပေႃးလုၵ်ႈၸၢႆးၵဝ် ၶႂ်ႈႁဵတ်းသိုၵ်း တႃႇၵႅတ်ႇၶႄမၢၼ်ႈမိူင်းတိူင်းၵႃးႁဝ်းတႄႉ ဢူႈယင်ႊ ဝႃႈသင်။ တင်းဢဝ်ၵုင်ႇဢဝ်မုၼ်ၸွမ်းဢိူဝ်ႈ။ ၵူၺ်းၵႃႊ ဢၼ်ၸဝ်ႈလူင်ႁွမ်ၵူၼ်းသိုၵ်းၼႆႉ ယင်ႊၵႃးတႃႇၵႅတ်ႇၶေ မိူင်းႁဝ်း။ ဢၢၼ်းၵႂႃႇၽၼ်းဢဝ်မိူင်းပိူၼ်ႈ၊ တႄႇတင်ႈမိူင်းဝူင်ႉ၊ တႃႇမၼ်းတေပဵၼ် ၸဝ်ႈဝူင်ႉလူင်။ လၢႆ ... သိုၵ်းဢၼ် တေၵႂႃႇႁိမ်ဢဝ်မၢၼ်ႈမိူင်းပိူၼ်ႈ၊ ပဵၼ်ပၢင်တိုၵ်း ဢၼ်မၢပ်ႇဢဝ်ၶွင်ပိူၼ်ႈၼၼ်ႉဢိူဝ်ႈ ... ၵွပ်ႈပၢင်တိုၵ်းၸိူၼ်း ... ၵူၼ်း တေလႆႈတၢႆၼမ်။ မၢၼ်ႈမိူင်းတီႈယူႇပိူၼ်ႈၵေႃႈလူႉ။ ပေႃႈမႄႈၸိူဝ်းလုၵ်ႈတၢႆ၊ လုၵ်ႈဢွၼ်ႇၸိူဝ်းပေႃႈမႄႈတၢႆ၊ ၵူၼ်း ၸၢႆးၸိူဝ်းလႆႈပဵၼ်ပေႃႈမၢႆႈ၊ ၼၢင်းယိင်းၸိူဝ်းလႆႈပဵၼ် မႄႈမၢႆႈ၊ ႁိူၼ်းယင်ႊမီးၵူၼ်းယူႇ၊ ၵူၼ်းယင်ႊမီးႁိူၼ်းယူႇ၊ ၼႃး ႁၢမ်းၵူၼ်း၊ ၵူၼ်းႁၢမ်းၼႃး၊ ၵျႂင်းႁၢမ်းၸဝ်ႈ ႁၢမ်းလုၵ်ႈဢွၼ်ႇ၊ လုၵ်ႈဢွၼ်ႇႁၢမ်းတီႈသွၼ်တီႈ ႁဵၼ်းၸိူၺ်း ... တေ မၢၵ်ႇမိူဝ်ၵႂႃႇ ... ။ ဝႆႉၶၼ်။ ထိုင်ဝႃႈ ၸဝ်ႈလူင်ပဵၼ်မႃး ဢေၵရၢၸ်ၸဝ်ႈဝူင်ႉႁေႃသႅင်လူင် ၸဝ်ႈလူင်ႁေလႃႈ။ တေၸင်ႈႁိုင်လႆႈၶႂ်ႊ။ ၽႂ်တေ လွတ်ႈလႆႈဢၼိၸ်ၸ။ ဝၼ်းၼိူင်ႈမႃး ဢေၵရၢၸ်ၵေႃႈ မေႃတၢႆယူႇ။ ပေႃးမၼ်းတၢႆၵႂႃႇ ဢၼ်မၼ်းတေလႆႈပိူင်ႇငမ်းၼၼ်ႉၵွၺ်းပဵၼ် ထၢင်လုၵ်းမွၵ်ႈဝႃးဢူၵ်း တင်းႁူၵ်းသွၵ်ႇၶၼ်ႉၵွၺ်း" ၼႆ။
"ထၢင်လုၵ်းဝႃးဢူၵ်း၊ ႁူၵ်းသွၵ်ႇ"
ၸဝ်ႈလူင်ငမ်ႈၵၼ်းလၢပ်ႇမၼ်းတင်းမႃႇတင်းႁႅင်းသေ ပေႃးၶႂ်ႈဢဝ်ၽၼ်းသႂ်ႇ ၶိင်းဢၼ်လၢတ်ႈၵႂၢမ်းဢၼိၸ်ၸ ၽၢႆႇၼႃႈမၼ်းၼၼ်ႉယူႇယဝ်ႉ။ ယႃႇပေႁဵတ်းၼႆသေ မၼ်းၸဝ်ႈၵေႃႈဝႆႉၸႂ်မၼ်းလီလီ။ ၶေႃႈၵႂၢမ်းၸိူဝ်းဢၼ်မၼ်း လၢတ်ႈၼႆႉ ပႅၵ်ႇၵၼ်တင်း ၵႂၢမ်းၸိူဝ်းပိူၼ်ႈႁူႉၵၢင်ၸႂ်မၼ်းသေလၢတ်ႈ "ၼေႃႈတီႈၶႃႈ"၊ "ဢမ်ႇၽွင်းလိူဝ်လႆႈၸဝ်ႈ ႁေႃသႅင်ၶႃႈ" ၼၼ်ႉတေႉ။ ပုၼ်ႈတႃႇၸဝ်ႈႁေႃသႅင်ၵေႃႉၼိူင်ႈ ၶေႃႈၵႂၢမ်းမၼ်းၸိူဝ်းၼႆႉ ပဵၼ်ဢၼ်ယိူၼ်ႉယၢပ်ႇၼႃႇ တေႉ။ ၵူၺ်းၵႃႊ မိူၼ်ၶိင်းၸၢင်ႊမႆႉ လၢတ်ႈၼၼ်ႉတႄႉ ၼင်ႇဝႃႈ လွင်ႈႁုၵ်းႁၢႆႉႁၢင်ႊၸႃႉ၊ ယၢပ်ႇယၢၵ်ႈၶၢၼ်ၸႂ် ၵွပ်ႈ ပၢင်သိုၵ်းၸိူဝ်းၼၼ်ႉ မၼ်းၸဝ်ႈ ပေႃးယၢမ်ႈႁၼ်မႃးၼမ်ယဝ်ႉ။ မိူဝ်ႈလဵဝ် ၸဝ်ႈၵဝ်ႇပေႃးပဵၼ် ၸဝ်ႈဝူင်ႉႁေႃသႅင်ၸဝ်ႈ ၼိူင်ႈဝႆႉယဝ်ႉ။ မိူင်းလၢၼ်ႉၸဝ်ႈၵေႃႈ ပဵၼ်မိူင်းဝူင်ႉလူင်မႃးဢၼ်ၼိူင်ႈယဝ်ႉ။ ၽူႈဢၼ်ဢွင်ႇပေႉၼၼ်ႉ လႆႈသင်မႃး ...
"ၽွင်းၼၼ် ယင်ႊပဵၼ်ႁဵတ်းၵူၼ်းသိုၵ်းသေ ပဵၼ်မႃးၸၢင်ႊမႆႉႁႃႉ"
"ဢိူဝ်ႈ"
"ယင်ႊသွၼ်ႇၸူဝ်ႈဝႃႈ ၸၢင်ႊမႆႉၼႆႉ ၵွၺ်းပဵၼ်ၵၢၼ်ႁူဝ်ယွႆႈ တႃႇမၢၼ်ႈမိူင်းဢၼ်ၼိူင်ႈႁႃႉ" ၶိင်းၼၼ်ႉ ၸင်ႇလူပ်းပႅတ်ႈလဝ်ႈၵိုတ်းၼႂ်းၵွၵ်းၼၼ်ႉ ဢိုၵ်ႉၼိူင်ႈ သေ ...
"သွၼ်ႇဢိူဝ်ႈ။ ၵၢၼ်လၢႆ ... ယင်ႊပွင်ႇသင်၊ ၵွပ်ႈပဵၼ်ၵၢၼ်ၶိူဝ်းႁိူၼ်းတူႊ ၵဝ်ၸင်ႇႁဵတ်း။ ၸႂ်ၵေႃႈယင်ႊသႃႇ။ ဢူႈတူႊၸဝ်ႇၶိုပ်ႈႁၼ်။ ဝၼ်းၼိူင်ႈဢူႈတူႊ ၸင်ႇ ..."

"ၸၢႆးၵဝ် ... မိူၺ်ႉ ႁႃးၵႂႃႇၸွၼ်ႇဢဵၼ်ႈႁိမ်းထိူၼ်ႇၸိူၼ်း။ ႁႃးပေႃႈလုၵ်ႈၶျႃးလႃႈ ယင်ႊႁဵတ်းၵၢၼ်ယဝ်ႉ" ဝႃႈၸိူၺ်ႉႁေ ၶီႇတင်းမႃႉၵေႃႉတူဝ်တူဝ် ဢွၵ်ႇၵႂႃႇ ၸူးထိူၼ်ႇ။ ၵဝ်တႄႉ ပေႉမႃးၶႂ်ႈဢဝ်ၵၢင်ႇၶႃသေ ယိုဝ်းပၢင်တၢႆး၊ တိုင်၊ ၵႂၢင်၊ ယီး၊ ၽၢၼ်း ၸိူၼ်း။ ၵူၺ်း ဢူႈတူႊယင်ႊႁႂ်ႈၵဝ်ယိုဝ်း။
"ၸၢႆးၵဝ် မႂ်းၶႂ်ႈတၢႆႁႃႉ" ဝႃႈၸိူၺ်ႉ။
"ႁႂ်း ... ၽႂ်တေမႃးၶႂ်ႈတၢႆ" ႁဵတ်းၸိူၺ်ႉၶၢၼ်ဢူႈတူႊ။
"မိူၼ်ၸိူၺ်ႉ ... သတ်းတင်းလၢႆၵေႃႈ ယင်ႊၶႂ်ႈတၢႆမိူၼ်ၵၼ်။ ပဵၼ်ၵူၼ်း လူဝ်ႇမေႃဝႆႉၸႂ် ႁၼ်ထိုင်ပိူၼ်ႈ။ ယႃႇၶႂ်ႈႁဵတ်းတီႈသတ်းၶဝ်" ဝႃႈၸိူၺ်ႉ။ မၼ်းတင်း တၢၼ်ႈထႅင်ႈ ...
"ၸၢႆးၵဝ် ... မႂ်းႁၼ်သတ်းၸိူၺ်း ယူႇလူၺ်ႈႁိူၼ်းႁႃႉ။ ၼင်ႈၵိၼ်ၸွမ်းၽိူၼ်ၶဝ်ႈႁႃႉ။ ၼွၼ်းၼိူဝ်ၵူႇႁႃႉ" ပဵၼ်ၵႂၢမ်းထၢမ်ယွႆႊယွႆႊ။ ႁဵတ်းၸိူၺ်ႉ ၵဝ်ၸင်ႇ
"ဢူႈႁဝ်းၵေႃႈလၢႆးယဝ်ႉ တူဝ်သီႇတိၼ်ၵေႃႈ ၵိၼ်ၼိူဝ်လိၼ်၊ ၼွၼ်းၼိူဝ်လိၼ်ၶၼ်ႉၼႄႇ။ ၼူၵ်ႉၸိူၺ်းတႄႉ ၼိူဝ်တူၼ်ႈမႆႉ။"

"ၼိူၺ်ႉ! ၸၢႆးၵဝ်။ ႁိူၼ်းၸိူဝ်းၸၢင်ႊမႆႉႁဝ်းၵၢႆႇၼၼ်ႉ မီးၵူၼ်းၵွၺ်းယူႇထင်။ ၵူၼ်းၵွၺ်းမေႃၵိၼ်ၶဝ်ႈ ၵိုၵ်းၽိူၼ်။ ၼွၼ်းၼိူဝ်ၵူႇ။ ၼႂ်းၶူင်းၵၢင်လၢႆ မႂ်းဢဝ် ၸၢင်ႊမႆႉၸိူၺ်း ပၢႆႇပၢၵ်ႈပႅတ်ႈလူႊ တေပဵၼ်သင်မႃး ..." ႁဵတ်း ၸိူၺ်ႉ ၵဝ်ၸဝ်ႇသွၼ်ႇၸူဝ်ႈ ၵႂၢမ်းဢူႈတူႊၵႂႃႇတင်းႁႅင်း။       
"ယင်ႊမီးၸၢင်ႊမႆႉၵေႃႈ ယင်ႊမီးႁိူၼ်း"
"ဢိူဝ် ... လႃႈ"
"ၽိူၼ်တင်ႇၵေႃႈ တေယင်ႊလႆႈႁၼ်"
"ၸႂ်ႈယဝ်ႉၵွၺ်ႈ! ၽွင်းၼၼ် ၵူၼ်းၸိူၼ်းၶဝ်တေႁဵတ်းႁိုဝ်ယူႇ၊ ႁဵတ်းႁိုဝ်ၵိၼ်၊ ႁဵတ်းႁိုဝ်ၼွၼ်း"
ၵဝ်ၸင်ႇၶဝ်ႈၸႂ်ၵႂၢမ်းဢူႈတူႊၵႂႃႇ။ ပေႃးယင်ႊမီးၸိူၺ်းၵူၼ်းႁဝ်းၵေႃႈ လူဝ်ႇၵိၼ်ၼွၼ်း မိူၼ်သတ်းၵွၺ်းယဝ်ႉ။ ဢူႈၸင်ႇယိပ်းႁူဝ်မႃႇၵဝ်ႁေ
"ၸၢႆးၵဝ် ၵၢၼ်ၸၢင်ႊမႆႉၼႆႉ ယင်ႊမၢၵ်ႈမီးလီပဵၼ်ၶႂ်ႊၵေႃႈ ယင်ႊဢိုပ်းတၢႆ။ ၵၢၼ်လၢႆၵေႃႈ ယင်ႊမိူၼ်မႂ်းထၢင်ႇ မဝ်မဝ်မၢင်ႊမၢင်ႊ။ ပဵၼ်ၵၢၼ်ႁဵတ်း ႁႂ်ႈၵူၼ်းႁဝ်း ယူႇလႆႈပဵၼ်ၵူၼ်း။ မႂ်းတူၺ်း ႁေႃသႅင်မိူင်းႁဝ်းလူႊ ပေႃးတၢၼ်ႇႁေႃ ၽီႁေႃသၢင်။ ႁေႃသႅင်ၼၼ်ႉၵေႃႈ မၼ်းပဵၼ်ၸၢင်ႊမႆႉၶဝ်ၵၢႆႇသၢင်ႈ။ ဝဵင်းတႃႉလီႁဝ်း ႁၢင်ႊလီၶိုၵ်ႉၶမ်ႇၵေႃႈ ပဵၼ် လမ်ႉမိုဝ်းၸၢင်ႊမႆႉ ဢမ်ႇၸႂ်ႈႁႃႉ။ ဝႃႈသိုဝ်ႈသိုဝ်ႈ ၵမ်ႇၾႃႇႁဝ်းငၢမ်းလဝ်းၵေႃႈ ပဵၼ်ႁိူဝ်ႇလႆၶႆးယွႆႉ ၸၢင်ႊမႆႉၶဝ်လၢႆ လၢႆ ..."
ၸဝ်ႈလူင်ၶုၼ်လူႇၽူင်း ပဵၼ်ဢၼ်ဢၢမ်းၵႂႃႇတေႉ။ ၵၢၼ်ၸၢင်ႊမႆႉ ဢၼ်မၼ်းလူမဝ်မႃးၼၼ်ႉ ႁဵတ်းႁႂ်ႈဝဵင်း တႃႉလီ ၶိုၵ်ႉၶမ်ႇႁိူဝ်ႈႁိူင်းၼႆဝႃႈ။ ႁဵတ်းႁႂ်ႈလုမ်ႈၾႃႉ ႁၢင်ႊလီမုၼ်းငၢမ်းၼႆဝႃႈ။ ယၢမ်ႈလႆႈယူႇသဝ်းၼႂ်းႁေႃသႅင်၊ တင်း ၶိူင်ႈယူႇသဝ်း တၢင်းတိုဝ်းၼမ်လၢႆသေတႃႉ မၼ်းၸဝ်ႈ ဢမ်ႇယၢမ်ႈယိုၼ်ယၼ် ပၺ်ႇၺႃႇၸၢင်ႊမႆႉမႃး သေပွၵ်ႈ။
"ဢူႈတူႊတင်းဝႃႈထႅင်ႈၶၼ်" ၶိင်းၼၼ်ႉ ၵိပ်ႈဢဝ်ၽၵ်းၵပ်း သႂ်ႇသူပ်းမၼ်းၵဵဝ်ႉယဝ်ႉသေ သိုပ်ႇတၢၼ်ႈ ...
"ၼိူၺ်ႉ ၸၢႆးၵဝ် ... ၽိူၼ်တင်ႇၸိူဝ်းဢူႈႁဝ်းၶဝ် ႁဵတ်းမႃးၼႆႉ ပေႃးၵွၺ်းဢဝ်မႃးတိုဝ်း တႃႇၵိၼ်၊ တႃႇၼင်ႈ၊ တႃႇဢုပ်ႇတႃႇဢူဝ်းၵွၺ်းတႄႉ ယင်ႊပွင်ႇ သင်"       
"ဢူႈႁဝ်းၵေႃႈ တေလႆႈၶိုၼ်ႈၵႂႃႇၵႃႈ ၼိူဝ်ၽိူၼ်ၼၼ်ႉၵွၼ်ႇႁႃႉ"
ၵဝ်ထၢမ်ၵႂႃႇႁဵတ်းၸိူၺ်ႉၵေႃႈ ဢူႈတူႊၶူဝ်ၵဝ်သေ ...

"ၽိူၼ်တင်ႇ ၸိူဝ်းႁဝ်းႁဵတ်းၼႆႉ ပိူၼ်ႈမႃးၼင်ႈဢုပ်ႇဢူဝ်းငူပ်ႉငီႉၵၼ် ၽၢႆႇၼႃႈမၢၼ်ႈတႃမိူင်းသေ ၸၢင်ႊလီၵၼ် (ငမ်းယဵၼ်)လႆႈ။ လိူတ်ႈတူၵ်းယၢင်ဢွၵ်ႇ ၸိူၺ်းၵေႃႈ ၸၢင်ႊဝႄႈလႆႈ။ လွင်ႈတၢင်းၸိူၺ်း ၵိုၵ်းပိုၼ်းမႃးသႃႊ။ ပေႃး ယဵမ်ႈပိုၼ်းဝၼ်းၵဝ်ႇ ၸဝ်ႇတေႁၼ်ယဝ်ႉ။ ၸင်ႇၼႆႉ ၸဝ်ႈလူင်ၵေႃႈ တေၼင်ႈၽိူၼ်မူႇလဵဝ်ၵၼ် တင်းလုၵ်ႈလၢင်း ၼၢင်းမေးမၼ်း။ ၵိၼ်မူၼ်ႊၵိၼ်သိူဝ်း။ ၸဝ်ႈလူင်ႁဝ်းၵေႃႈ သင်မၼ်းသွၼ်ႇၵူၼ်းတင်းလၢႆ မိူၼ်မုင်ႉႁေႃတေႃႁိူၼ်း မၼ်းတႄႉ တေလီၶႂ်ႊ။ ပဵၼ်သင်မၼ်းသမ်ႉ လိုမ်းလွင်ႈဢၼ်ၼင်ႈၼိူဝ်ၽိူၼ်သေ ဢုပ်ႇဢူဝ်းငူပ်ႉငီႉၵၼ်၊ လီၵၼ်၊ ၶဝ်ႈဢွၵ်ႇၵၼ်၊ တေယင်ႊၸႂ်ႈၵွပ်ႈလွင်ႈတၢင်းသင်။ ၵွပ်ႈမီး လေႃၽ၊ တေႃသ၊ မေႃႁ ၼႂ်းလိူတ်ႈမၼ်းဢိူဝ်ႈ"
ဢႂ်း ... လေႃၽ၊ တေႃသ၊ မေႃႁ မီးၼႂ်းလိူတ်ႈၵဝ်ၼႆႁႃႉ။
"ၼိူၺ်ႉ ... ၸၢႆးၵဝ် ... မၼ်းၸဝ်ႈတေယၢမ်ႈတမ်းဝၢင်းလၢႆးတိုၵ်း တႃႇႁုပ်ႈသိမ်းဢဝ်မိူင်းၽၢင်၊ မိူင်းၶႄႇ၊ မိူင်း သၢင်းထွႆး၊ မိူင်းပိဝ်ႇ ၸိူၺ်း ၼိူဝ်ၽိူၼ်ယူႇ။ ၽိူၼ်ၸိူၼ်း တေယင်ႊၶႂ်ႈႁႂ်ႈမီး လွင်ႈလိူတ်ႈတူၵ်းယၢင်ဢွၵ်ႇ။ ၽိူၼ်ၸိူၼ်း ၵွၺ်းၶႂ်ႈႁၼ်လွင်ႈလီၵၼ်ၵွၺ်း။ လၢႆၸဵဝ်းႁႂ်ႈၸဝ်ႈလူင်ႁူႉသေ တၼ်းဢဝ်လွင်ႈလီ ၵၼ်ၵွၺ်းလႃႈ။ ဢူႈမုင်ႈမွင်းယူႇ။"
ၽိူၼ်ႁူၺ်ႇၼိူင်ႈၼႆႉ မၼ်းၶႂ်ႈလႆႈငမ်းယဵၼ်ၵွၺ်းဝႃႈ။ ၽိူၼ်မႆႉ တူဝ်ဢမ်ႇမီးၸႂ်ၶဝ်ၵေႃႈ တင်းၶႂ်ႈလႆႈငမ်းယဵၼ် ဝႃႇ။
"ဢူႈတူႊတၢၼ်ႈၸူဝ်ႈတေႉ" ၶိင်းၸၢင်ႊမႆႉၼၼ်ႉ သိုပ်ႇထႅင်ႈ
"မႂ်းတူၺ်း ... ၸဝ်ႈလူင် လႃႊႁႅၼ်းသိုၵ်း တႃႇသိမ်းဢဝ်မၢၼ်ႈမိူင်းပိူၼ်ႈယူႇယဝ်ႉ။ ပေႃးလႆႈတင်းၵုၼ် ၸင်ႇ ပဵင်းပေႃးႁႃႉ။ ဝူင်ႉႁေႃသႅင်ဢၼ်လႆႈမႃးၵွပ်ႈ သၢႆၸႂ်ပိူၼ်ႈ တေႁဵတ်းသင်။ ပေႃပဵၼ်ၵဝ်တႄႉ ယင်ႊဢဝ်"
"ၵွပ်ႈသင် မႂ်းတၢၼ်ႈၸိူၺ်ႉ"
ၸဝ်ႈလူင် ၸင်ႇထၢမ်ၵႂႃႇ တင်းသူၼ်ၸႂ်သူၼ်ၶေႃး။ ၶိင်းၼၼ်ႉ ၸင်ႇပၵ်းတႃတူၺ်း ၸဝ်ႈလူင်သေ ...
"ၵွပ်ႈဝႃႈ ၵဝ်ပဵၼ်ၵူၼ်းၵေႃႉၼိူင်ႈ ဢၼ်ပဵၼ်ၵူၼ်းတေႉတေႉ" ၵူၼ်းၽဵင်ႈၵေႃႉၼိူင်ႈ ၽၢႆႇၼႃႈၸဝ်ႈလူင်ၼႆႉ ဝႃႈတူဝ်မၼ်း ပဵၼ်ၵူၼ်းတေႉတေႉၼႆဝႃႈ။ ၶိင်းၼၼ်ႉ ၸင်ႇလွမ်ငွၵ်ႈတူၺ်း ငဝ်းလပ်းသိင်ႇလူင် ဢၼ်ၽိုတ်ႉၶဝ်ႈႁူး မႃးၼၼ်ႉသေ ထူၺ်ႈၸႂ်လူင်ၵမ်းၼိူင်ႈ။
"ဢူႈတူႊတၢႆ ပေႃးထူၼ်ႈပီႊယဝ်ႉ။ လွင်ႈလီၵၼ် ဢၼ်မၼ်းမုင်ႈမွင်းမႃးၼၼ်ႉ တင်းတိုၵ်ႉၵႆၶၼ်။ ဢၼ် မၼ်းယၢမ်ႈဝႃႈ 'ပေႃးပဵၼ်ၵူၼ်း လူဝ်ႇမီးၸႂ်ႁၼ် ထိုင်ၵၼ်' ၼၼ်ႉ တင်းမီးၼႂ်းၸႂ်ၵဝ် ထိုင်ယၢမ်းၸင်ႇၼႆႉၶၼ်။ ၸႂ်ႈ ဢိူဝ်ႈ။ တူၺ်းသႃႇသၼႃႇႁဝ်းသင်ႇသွၼ်ၼၼ်ႉလူႊ။ ႁႂ်ႈမီးတၢင်းႁၼ်ထိုင်ၼိူဝ်ၵၼ်၊ ယႃႇပေႁဵတ်းတီႈၵၼ်။ မိူၼ် ၸိူၺ်ႉယဝ်ႉ ႁဝ်းယင်းယင်ႊၶႂ်ႈတၢႆ၊ ၽႂ်တေမႃးၶႂ်ႈတၢႆ။ ယႃႇပေၶႂ်ႈႁဵတ်းတီႈပိူၼ်ႈ၊ ယႃႇၶႂ်ႈဢဝ်ပိူၼ်ႈတၢႆ။ ပေႃးႁဝ်း မီးတၢင်းႁၼ်ထိုင် ၼိူဝ်ၵၼ်ၸင်ႇမီးသိၼ်။ မီးသိၼ်ၸင်ႇ မီးၾိင်ႈယၢမ်ႈလီ။ ၾိင်ႈယၢမ်ႈလီၸင်ႇ မီးၸႂ်မဵတ်ႈတႃႇ။ မီးၸႂ်မဵတ်ႈတႃႇ ၸင်ႇပဵၼ်ၶဝ်ႈၸိုဝ်ႈႁွင်ႉၵူၼ်း။ ပဵၼ်ၵူၼ်းၸင်ႇ ၸၢင်ႊလီၵၼ်"
ၸႂ်ႁၼ်ထိုင်ၵၼ်၊ သိၼ်၊ ၾိင်ႈယၢမ်ႈလီ၊ မဵတ်ႈတႃႇ၊ ငမ်းယဵၼ် တႄႇၵႂႃႇၶေႃႈၸိူဝ်းၼၼ်ႉ ႁိူဝ်ႈလႅင်းမႃး တီႈ တူဝ်ၸဝ်ႈလူင်ၶုၼ်လူႇၽူင်းယူႇယဝ်ႉ။ ၵွပ်ႈၸၢင်ႊမႆႉၵေႃႉၼႆႉသေ လေႃၽ၊ တေႃသ၊ မေႃႁ မၼ်း ဢၼ်မုင်းသုမ်ႇမႃး တင်းႁိုင်ၼၼ်ႉ ပေႃးတၢၼ်ႇမူၺ်ၺႃးလႅတ်ႇသေ ဢဝ်ႁႅင်ႈယႅတ်းၵႂႃႇပႅတ်ႈယူႇယဝ်ႉ။
"မိူၺ်ႈ ၵဝ်မႃးယႃးၸူဝ်ႈမႂ်း ၵဝ်ထၼ်ႉၸူမ်းတေႉ။ ၵဝ်ယႃးမႃး ဝၼ်းလီဝၼ်းၶိုၵ်ႉ တၢၼ်ႇလႅတ်ႇတၢၼ်ႇဝၼ်း ယင်ႊဢၢၼ်ႇလႆႈ။ ၵွၺ်း ... မိူၺ်ႈႁိူဝ်ႈလႅင်းသေ ပိူၼ်ႈယဝ်ႉ။ မႃး ... ယုၵ်ႉထႅင်ႈၵွၵ်းၼိူင်ႈ ႁႂ်ႈၵၢင်ၸႂ်ၸဝ်ႈလူင် ၸဵဝ်း လႅၵ်ႈလၢႆႊသေ ယၢင်ႇလွင်ႈဢွၵ်ႇလိူတ်ႈဢွၵ်ႇယၢင်ၽႂ်းၽႂ်း။ ႁႃးတွၵ်းၵၼ်ႁေ ယွၼ်းၵၢဝ်ႇ ... ၼေႃႈ ..."
"တႃႉလီ"
"တႃႉလီ"
ၵွၵ်းၼမ်ႉလဝ်ႈၶဝ် မႃးတုမ်ႉၵၼ်။ ၽုၵ်ႈမႃးၵၢင်ၼႂ် ၸဝ်ႈလူင်ၸင်ႇပူင်ၵႂၢမ်းၼၵ်း ႁႂ်ႈတပ်ႉသိုၵ်းမၼ်း ဢဝ် ငမ်းယဵၼ်ၵၼ်တင်း မိူင်းၸိူဝ်းဢၼ်ၸဝ်ႈပွႆႇသိုၵ်း ၵႂႃႇလေႃႇတိုၵ်းၼၼ်ႉယဝ်ႉ။ ဝၢႆးသေၼၼ်ႉ မိူင်းလၢၼ်ႉၸဝ်ႈၵေႃႈ ဢမ်ႇႁႃမႄႇၶႂၢၵ်ႈမၢၼ်ႈမိူင်းထႅင်ႈ။ (တႃႉလီသေးလၢႆလႃႈ မႂ်းဝႃႈ)



1. ႁၢၼ်ႉ = ဢမ်ႇၸႂ်ႈ 'လၢၼ်ႉ' ယဝ်ႉ၊ ၵွပ်ႈထႆးႁွင်ႉ 'ရၢၼ်ႉ'၊ လၢဝ်းသမ်ႉႁွင်ႉ 'ႁၢၼ်ႉ'
2. လုၵ်ႈၼွင်ႈ = မၼ်းပိူင်ႈၵၼ်တင်းလုၵ်ႈၼွင်ႉ၊ လုၵ်ႈၼွင်ႈ - ပွင်ႇဝႃႈၵူၼ်းၸွမ်းလင်၊ လုၵ်ႈၼွင်ႈပွင်ႈပၢႆ။
3. လၢႆ = ဢၼ်ၼႆႉ
4. ၵူၺ်းၵႃႊ = ၶေႃႈၵပ်းဢၼ်ထႅင်ႈလႅင်း
5. ၶႆႉ = ၵႃႊၼႆႉ၊ မွၵ်ႈၼႆႉ။
6. ၸိူၼ်း = ၸိူဝ်းၼၼ်ႉ
7. လၢႆး = ပဵၼ်လၢႆးၶႅၼ်ႉ။ လၢႆးၼႆႉ တီႈပွင်ႇတၢၼ်ႇဢၼ် ပဵၼ် Technique
8. ၶိူဝ်းႁိူၼ်းတူဝ်ႇ = ၸိုဝ်ႈၶိူဝ်းႁိူၼ်းၶဝ် ပဵၼ် 'တူဝ်ႇ'၊ Surname
9. ၸိူၺ်း = ၸိူဝ်းၼႆႉ
10. ဝႆႉၶၼ် = ဝႆႉၵွၼ်ႇ၊ ဝႆႉသေၵွၼ်ႇ။
11. ၶႂ်ႊ = ၵႃႊႁိုဝ်
12. ဝႃးဢူၵ်း = ၶိုင်ႈဝႃးၼိူင်ႈ
13. ၶၼ်ႉ = ၵႃႊၼၼ်ႉ၊ မွၵ်ႈၼၼ်ႉ။
14. ငမ်ႈ = ၵမ်ဝိုၼ်းဝိုၼ်း၊ ၵမ်ႁတ်ႉဝႆႉႁႅင်းႁႅင်း။
15. ၸူဝ်ႈ = မႅၼ်ႈ (ယင်ႊသွၼ်ႇၸူဝ်ႈ = ဢမ်ႇဝူၼ်ႉမႅၼ်ႈ)။ မၢင်ႊတီႈ ႁၼ်တႅမ်ႈ 'ၸေႃႈ'။
16. လူပ်း = ပိူင်ပဵၼ်ဢၼ်ဢဝ်သေဢၼ်ဢၼ် ၵဵၼ်မႃးတွမ်ႊၵၼ်၊ ၶႂ်ႈဝႃႈ ၶွတ်ႇယွတ်ႈပႅတ်ႈ။
17. ၸၢဝ်ႇၶိုပ်ႈႁၼ် = တႄႉလၢမ်းဢွၵ်ႇ
18. မိူၺ်ႈ = မိူဝ်ႈၼႆႉ
19. ၸွၼ်ႇ = ဢႅဝ်ႇလႄႇ၊ တၢင်းပၼ်ႇတူင်ႇၸိူဝ်ႉၼိူင်ႈ။
20. ၶျႃး = လိုဝ်ႈ။
21. ၵၢင်ႇၶႃ = ၵၢင်ႇၶႃၼႆႉ ဢဝ်မႆႉၵူင်ႇသေ ၸႂ်ႉၸိူၵ်ႈမႆႉပဵၼ်ၼဵၼ်မၼ်း။ ၸႂ်ႉပိုၼ်မႆႉပဵၼ်လႅမ်ႈမၼ်း။
22. ႁဵတ်းတီႈ = ၶီႇၼဵၵ်း၊ ငႅၼ်း၊ ၶႃႈႁႅမ်၊ မၢပ်ႇ။
23. ယွႆႊယွႆႊ = ၵႂၢမ်းယွႆႊ၊ ၶႂ်ႈဝႃႈ ယင်ႊမီးလွၼ်ႉမီးၵႅၼ်။ ယင်ႊပဵၼ်ၶူဝ်ႈပဵၼ်ၵိင်ႇ၊ ယွႆႊယွၵ်းဝႆႉ။
24. ၶၼ်ႉၼႄႇ = ၵွၺ်းလေႃႇ၊ ၵွၺ်းဢိူဝ်ႈ။
25. ဢိူဝ် ... လႃႈ = ဢိူဝ်ႈလေႃႇ
26. ၶဝ်ႈၸႂ် = တၢင်းဢၼ်ႁူႉႁၼ်ၵႂႃႇ (နားလည်သဘောပေါက်မှု)၊ ပွင်ႇၸႂ် ဢၼ်ဝႃႈၼၼ်ႉ ဢမ်ႇၸိုဝ်ႈၵႂၢမ်းတႆး။ သူၼ်ၸႂ် = စိတ်ဝင်စားမှု။
27. လူမဝ် = ထၢင်ႇလဵၵ်ႉ (အထင်သေး) ၼႆႉ ဢဝ်ၵႂၢမ်းမၢၼ်ႊ ပိၼ်ႈၾၢၼ်ႊပဵၼ်မႃး။
28. ယိုၼ်ယၼ် = ႁပ်ႉၶၢမ်ႇ (လက်ခံ၊ အသိအမှတ်ပြု)၊ မၵ်းမၼ်ႈ။
29. လေႃၽ၊ တေႃသ၊ မေႃႁ = လေႃးၽ၊ တေႃးသ၊ မေႃးႁ (တႅမ်ႈပိူင်ပႃႇလိတႆး)
30. ယႅတ်း = တၢင်းဢၼ်ႁႅင်ႈႁဝ်ႇၵႂႃႇႁင်းမၼ်း။
31. ယႃး = ၺႃး၊ ႁူပ်ႉ။