ယုင်းၶဵဝ်

ယွၼ်ႉပိူဝ်ႈ ဢမ်ႇလႆႈယူႇ ၼႂ်းႁၢင်ႈၼႂ်းႁေႃယဝ်ႉလႄႈ ၸဝ်ႈဝေႇသၼ်ႇၶဝ် ပေႃႈမႄႈလုၵ်ႈ သီႇၵေႃႉ ပၢႆႊမႃးတီႈ ဝဵင်းလိူဝ်ႇယူႇယဝ်ႉ။ ၸဝ်ႈဝေႇသၼ်ႇၵေႃႈ ၶႂ်ႈၼင်ႈၵၢၼ်လီလီၼႆလႄႈ ၸင်ႇလႆႈၶၢတ်ႈၶွင်ႉ ဢၼ်ပိူၼ်ႈႁွင်ႉဝႃႈ တႅၵ်ႈၶၢၼ်းၼၼ်ႉ ၶွင်ႉၼိူင်ႈ ဢၼ်မီးၼိူဝ်ၼိူဝ် ၸဵတ်းၸၼ်ႉၼၼ်ႉ။

"ၼၢင်းမတီႇ ၽုၺ်ႇဢႄးၶွၼ်း/Air Con မႃးပၼ်ၵဝ်ၸဝ်ႈလူႊ"

ၸဝ်ႈဝေသၼ်ႇ ၼင်ႈၵၢၼ်ဢွၵ်ႇႁိူဝ်ႇၼမ်ၼႃႇလႄႈ ၸင်ႇလႆႈၸီႉသင်ႇ မေးၼၢင်းမၼ်းၸဝ်ႈယူႇယဝ်ႉ။ ၼၢင်းမတီႇ ၽုၺ်ႇဢႄးၶွၼ်းပၼ်ယဝ်ႉသေ ၶိုၼ်းထၢမ်မၼ်းၸဝ်ႈဝႃႈ

"ၸႃႇၼီႇ လႄႈ ၵၼႃႇၸိၼ်ႇ ၵႂႃႇလႂ်ၶႃႈ ၸဝ်ႈႁဝ်း"

"ဢေႃ ... လုၵ်ႈႁဝ်းတင်းသွင် ၵႂႃႇလဵၼ်ႈ ၶွမ်ႇၽိဝ်ႇထႂ်ႇၵဵမ်း ၼႆဝႃႈ၊ ပွႆႇပၼ်ၶဝ်လဵၼ်ႈဝႆႉလႄႈ"

"ဢေႃႈၶႃႈၸဝ်ႈႁဝ်း"

ယဝ်ႉၵေႃႈ တူၺ်းဢွမ်မူင်း ရူဝ်ႊမႅၼ်ႊသႅၼ်ႊ/Romanson မၼ်းၼၢင်းယဝ်ႉသေ ထိုင်ၶၢဝ်းယၢမ်း ၵႂႃႇသိုဝ်ႉမၢၵ်ႇ မႆႉယဝ်ႉလႄႈ မၼ်းၼၢင်း ၸင်ႇထႆႇလၢႆႊၶူဝ်းလဵင်းမၼ်း၊ ဢဝ်ၾူၼ်းမိုဝ်းထိုဝ် ၵျီႊဢႅသ်ႉဢႅမ်ႊ/GSM၊ ဢဝ်ၸွင်ႈ ယႃႊမႃႊသူႊ/Yamasu သေပႆဢွၵ်ႇ ၶွင်ႉႁိူၼ်းၶဝ်ၵႂႃႇ။ ၽွင်းယၢမ်း မၼ်းလူင်းၵႂႃႇ တီႈတႂ်ႈ၊ ၽုၺ်ႇၾၵ်းတူ ၶူဝ်လႆ ထၢတ်ႈၼၼ်ႉၵေႃႈ ႁၼ်ၵူၼ်းပႅၵ်ႇၼႃႈၵေႃႉၼိူင်ႈ၊ ပီးပီးၼႃႈတႃလမ်၊ ၼုင်ႈၶူဝ်း ၵူၼ်းၶိူဝ်းၼႃႈၽိူၵ်ႇၶဝ်ဝႆႉလႄႈ ၼႂ်းၸႂ်မၼ်းၼၢင်းၵေႃႈ ပႅၵ်ႇပိူင်ႈၸႂ်ၵႂႃႇ ၵမ်းလဵဝ်ယဝ်ႉ။ သိုပ်ႇပႆၵႂႃႇ ႁွတ်ႈတီႈတၢင်းၵႃးယဝ်ႉသေ

"တႅၵ်ႉသီႊ"

ၵႃးၸၢင်ႈ တႅၵ်ႉသီႊ/Taxi ၼၼ်ႉၵေႃႈ ၶပ်းမႃးႁိမ်းမၼ်းသေ

"တေၵႂႃႇလႂ်ၶႃႈ"

"ၵႂႃႇတီႈ သဝႅၼ်ႊထီႊဢဵတ်ႉ/78 ၶႃႈဢေႃႈ"

ႁွတ်ႈၵႂႃႇတီႈ သဝႅၼ်ႊထီႊဢဵတ်ႉၼၼ်ႉသေ မၼ်းၼၢင်း လိူၵ်ႈတူၺ်း မၢၵ်ႇမႆႉ လႅပ်ႈဢမ်ႇဝၢၼ်လႄႈ ၸင်ႇလႆႈဢဝ် မိုဝ်းထိုဝ် မၼ်းသေ ၵပ်းၸူးသေလၢတ်ႈ

"ႁႄႊလူဝ်ႊ ... ၸဝ်ႈႁဝ်းၶႃႈႁႃႉ၊ မၢၵ်ႇမႆႉမိူဝ်ႈၼႆႉ ဢမ်ႇလႅပ်ႈဝၢၼ်ၶႃႈ၊ ၸဝ်ႈႁဝ်းတေသုင်းသင်ၶႃႈ"

"ဢေႃ ၸိူင်ႉၼၼ်ႁႃႉ၊ သိုဝ်ႉ ဢႅမ်ႊတူဝ်းၼတ်ႉသ်/M'Donuts လႄႈ ၶႅပ်ႊၽၵ်ႉၶျီႊၼူဝ်ႊ/Cappcuhino မႃးၵေႃႈ လႆႈယဝ်ႉ။ ယဝ်ႉၵေႃႈ သိုဝ်ႉပႃး ႁၢတ်ႉတိၵ်ႉ/Hard Disk မႃးလုၵ်ႈၼိူင်ႈလူႊ၊ ႁၢတ်ႉတိၵ်ႉ တီႈၶွမ်းၸဝ်ႈႁဝ်း ဢမ်ႇ လီယဝ်ႉ"

"ဢေႃႈ လႆႈယူႇၶႃႈၸဝ်ႈႁဝ်း"

မၼ်းၼၢင်း ၵႂႃႇသိုဝ်ႉ ဢၼ်ၸဝ်ႈဝေသၼ်ႇ သင်ႇယဝ်ႉသေ လႆႈၶိုၼ်းပွၵ်ႈမႃး တီႈၶွင်ႉႁိူၼ်းၶဝ်ယူႇယဝ်ႉ။ ၽိူဝ်ႇထိုင် ႁွတ်ႈ ၼႂ်းၶွင်ႉႁိူၼ်းၼၼ်ႉ လႆႈႁၼ် ၵူၼ်းပႅၵ်ႇၼႃႈ ၵေႃႉၼၼ်ႉလႄႈ ၸဝ်ႈဝေႇသၼ်ႇ ဢုပ်ႇဢေႃးၵၼ် ယူႇလူင်လၢင် ယဝ်ႉ။ ၼၢင်းမတီႇၵေႃႈ ၵႂႃႇႁၢင်ႈႁႅၼ်း တၢင်းၵိၼ်မႃးသေ မႃးတမ်းပၼ်ၶဝ်သေ ၸဝ်ႈဝေႇသၼ်ႇ ၸင်ႇသိုပ်ႇမိုတ်ႈ ပၼ်

"ၼႆႉပဵၼ် မိသ်ႉထႂ်ႇၸူသၵႃႇ ၼႆဝႃႈ၊ မၼ်းယူႇတီႈ မိူင်းဢိၼ်းတီးယႂ်းဢိူဝ်ႈ။ မၼ်းမႃးႁပ်ႉတၢင်းလူႇ လုၵ်ႈႁဝ်းတင်း သွင်ၼႆဝႃႈ"

ၼၢင်းမတီႇ ၸင်ႇဝႃႈ

"ဢေႃႈ လႆႈယူႇၶႃႈ၊ ၵိၼ်တၢင်းၵိၼ်ၵွၼ်ႇၶႃႈလႄႈ မိသ်ႉထႂ်ႇၸူႇသၵႃႇ"

မိသ်ႉထႂ်ႇ ၸူႇသၵႃႇ ၸင်ႇဝႃႈ

"လႆႈယူႇၶႃႈ၊ ၶႃႈဢမ်ႇပေႃးၵိၼ်လႆႈၼမ်ၶႃႈ"

လုၵ်ႈၶဝ်တင်းသွင် လႆႈငိၼ်းၶဝ်ဢုပ်ႇလႄႈ လႆႈပၢႆႊၵႂႃႇမႅပ်းယူႇ တီႈၼႂ်းႁွင်ႈၼမ်ႉယူႇယဝ်ႉ။ ၼၢင်းမတီႇ ၵႂႃႇၸွၼ်ႇ ၵႂႃႇႁႃတူၺ်း လႆႈႁၼ် ၶႅပ်းတိၼ် သၶေႃး/Scholl တင်း ၵျိဝ်ႊတၼ်ႊၼူဝ်ႊ/Giordano လႄႈ ႁူႉဝႃႈ ၶဝ်ႈမႅပ်ႈယူႇ ၼႂ်းႁွင်ႈၼမ်ႉၼႆလႄႈ ၸင်ႇႁွင်ႉၶဝ် ဢွၵ်ႇမႃးယူႇယဝ်ႉ။ မိသ်ႉထႂ်ႇၸူႇသၵႃႇၵေႃႈ ႁွင်ႉလုၵ်ႈၶဝ်တင်း သွင်ၵႂႃႇယဝ်ႉ။

သၢႆလူမ်းၵေႃႈ ပဝ်ႇလွႆးလွႆး၊ ၾူၼ်ၵေႃႈတူၵ်းယွႆးယွႆး၊ ၵေႃႉဢၼ်တဵတ်ႇယဵၼ် ၼင်ႈယူႇၼိမ်ၼိမ် တီႈၽၢႆႇၼႃႈထီးဝီး/ TV ၼႆတႄႉ ပဵၼ်ၸဝ်ႈဝေႇသၼ်ႇ တူၺ်းပွႆးမၢၵ်ႇၼင်လွမ်ႊ မၼ်ႊယူႊ/Man U တင်း ၶျႅလ်ႊသီႊ/Chelsea ယူႇယဝ်ႉ။